ПАТOT НА ПОДВИЖНИКОТ ГЛАВА ДВАЕСЕТ И ВТОРА

ПАТOT НА ПОДВИЖНИКОТ
ГЛАВА ДВАЕСЕТ И ВТОРА

За користењето на материјалните нешта

Човекот е составен од душа и од тело, и во нашето дејствување овие две не можат да се разделат. Затоа, нека и телото ти служи. Христос ги познаваше нашите слабости и заради нас употребуваше зборови и движења, па дури и Својата плунка како и земјата. Заради нас допушти Неговата сила да истекува од краевите на Неговата облека (Мт. 9:20; 14:36), од убрусите и појасите на апостол Павле (Дел. 19:12) и од сенката на апостол Петар (Дел. 5:15).

Така и ти, потпирај се на сè што е земно како на стап на сеќавањето на макотрпното одење по тесната патека. Белината на снегот, синевината на небото, окото на инсектот што светка како скапоцен камен, жештината на пламенот — целата твар што ја впиваш со сетилата — нека те потсетува на Творецот. Но пред сè, користи го она што Светата Црква ти го дава како помош за исполнување на заповедите: да ги принесеш своите членови во служба на правдата за осветување (Рим. 6:19). Пред сè — Светото Причестување и другите Свети Тајни, како и Светото Писмо.

Црквата ти ги дарува и светите икони на Пресвета Богородица, ангелите и светителите, молитвите пред нив, свеќите, темјанот, осветената вода, сјајот на одеждите и црковното пеење. Прими го сето тоа и користи го со благодарност за своето растење во верата, за умножување на добродетелите и за духовно благосостојба на твојот пат.

Слободно излевај ја својата љубов кон Сèдобриот Бог на љубовта: целивај го Крстот и иконите, украсувај ги со цвеќе. Кога злото би се уништувало со молчење, тогаш и доброто би имало простор да дише. Кога она што со љубов се дава, со љубов се прима, дометот на љубовта расте и се шири — а тоа е целта на твојот подвиг. Колку е поголема реката, толку е пошироко и нејзиното устие.

Како потпора во борбата, користи го и своето тело. Ослаби го, нека не биде заробено од земните желби. Нека и тоа има удел во твојот труд. Ако сакаш да се научиш на кротост, нека и телото ти биде кротко и смирено, нека се поклонува до земја. Паѓај на колена, со лицето кон земјата, колку што можеш во самотија; но потоа веднаш стани, зашто по секое паѓање следи враќање кон Христос.

Знакот на Крстот секогаш прави го со внимание, зашто и тоа е молитва без зборови. Во еден краток миг, без празни зборови, Крсното знамение јасно ја изразува твојата волја да имаш удел во Христовиот живот, да ја распнуваш својата плот и со слободна волја, без роптање, да го примаш сето она што ти е испратено од Света Троица. Освен тоа, знакот на Крстот е моќно оружје против злите духови. Користи го тоа оружје често и со расудување.

Куќа никогаш не се гради без најнапред да се подигнат носечките столбови. Само силниот човек нема потреба од потпора однадвор. Но, дали си ти силен? Не си ли ти најслабиот меѓу слабите? Не си ли сè уште дете?

Тит Колиандер

Подготвил С.Стефковски

19.12.2025

Друго:

Подготвил С.Стефковски

06.11.2025

Patot.na.podviznikot14