Одбележани 10 години македонско-француската соработка во областа на културното наследство

Скопје, 1 јуни (МИА) - Република Македонија е земја со големо културно-историско богатство, низ кое се кали постоењето на македонскиот идентитет. Токму затоа Владата и Министерството за култура како примарна цел  ја имаат  заштитата и вреднувањето  на ова поле на престиж,  кое ни обезбедува афирмација на меѓународен план, со силата на материјалните факти ископани од рацете на вредните археолози, рече министерката за култура, Елизабета Канческа-Милевска на одбележувањето по повод 10 години македонско-француска соработка во областа на културното наследство.

- Во овие десет години, голем број на македонски и на француски архитекти, историчари, историчари на уметноста, археолози, љубители на културното наследство и старите урбани јадра, заеднички размислуваа и работеа во служба на  културното наследство, изјави инистерката Канческа-Милевска во Музејот на Македонија.

Таа потенцира дека проектот започнал со партнерската соработка со Град Скопје, со Битола, a од неодамна и со Велес, како седиште на Асоцијација на градови со архитектонско наследство.

Канческа-Милевска посочи и на трите потпишани договори (2002/2004, 2005/2007, 2008/2010) меѓу Министерството за култура на Република Македонија и Амбасадата на Франција, кои, како што рече, се основа и правен доказ за нераскинливото партнерство и пријателство што владее меѓу две земји.

Амбасадорот на Франција во Македонија, Бернар Валеро, изјави дека во последните 10 године е воспоставена солидна база за соработка и оти се потпишани повеќе спогодби кои се применуваат. 

Според него, многу е значајно што во проектите секогаш имале поддршка од Министерството за култура на Македонија и биле вклучени повеќе градоначалници, кои на локален план оствариле добра работа.

Амбасадорот Валеро најави дека и во иднина имаат намера да продолжат да соработуваат со македонските општини.

Градоначлникот на Скопје Коце Трајановски изјави дека овој мал јубилеј е уште еден показател за добрите односи меѓу Македонија и Франција, чиј резултат е и остварената соработка меѓу градовите и организациите од областа на културата. Тој потенцира дека за 10 години, со помош на ова партнерство се реализирале проекти и иницијативи за подобро управување и вреднување на чаршиите и старите градски центри.

Еден од резултатите од оваа соработка, како што истакна Трајановски, е формрањето на Асоцијација на градови од Македонија со архитектонско наследство, во која членува 41 општина.

- Преку Асоцијацијата се отворија можности за соработка и размена на искуства со Националната асоцијација на градови и региони на историја и уметност и градови со заштитени зони од Франција, рече Трајановски. Според него, во поголемиот дел од градовите од Македонија се зачувани старите градски јадра кои се средиште на градскиот живот и се вредни и бесценети показатели на идентитетот, на традицијата и на минатото.

На манифестацијата присуствуваа и градоначалниците на Битола Владимир Талески и на Велес Горан Петров, кој е и претседател на Асоцијација на градови од Македонија со архитектонско наследство. мд/са/13:02

 Обраќање на министерката Канческа-Милевска по повод 10 годишнината од француско-македонската соработка на полето на културно-историското наследство

1 јуни

Говор на министерката за култура, м-р Елизабета Канческа-Милевска на прославата по повод 10 годишнината од француско-македонската соработка на полето на културно-историското наследство.

Почитуван г. Бернар Валеро, амбасадор на Република Франција во Република Македонија, Почитуван г. Жан Руже, потпретседател на  Националната асоцијација на градови и региони на историја и уметност и градови со заштитени зони, градоначалник на Сент, Франција,

Почитуван г. Коце Трајановски, градоначалник на Град Скопје,

Почитуван г. Владимир Талевски, градоначалник на Битола,

Почитуван г. Горан Петров, градоначалник на Велес и претседател на Асоцијацијата на градови од Македонија со архитектонско наследство,

Почитувани гости,
Дами и господа,

Република Македонија е земја со големо културно- историско богатство, низ кое се кали постоењето на македонскиот идентитет. Токму затоа Владата на Република Македонија и Министерството за култура како примарна цел  ја имаат  заштитата и вреднувањето  на ова поле на престиж,  кое ни обезбедува афирмација на меѓународен план, со силата на материјалните факти ископани од рацете на вредните археолози.

Токму затоа, ми претставува особена чест и задоволство што денеска, во присуство на нашите големи поддржувачи и партнери од Република Франција, можеме да ги изложиме на вреднување плодовите од десетгодишната соработка во областа на културното наследство, кое ја потврдува автентичноста на историјата  и цивилизација на двете земји во светот.

Вистинскиот приод кон расветлувањето на мистичните длабочини на историјата на Република Македонија и Република Франција започна во 1999 година. Од тогаш до денес, реализирани се бројни активности, за автентично спојување на многу историски мозаици. Во овие десет години, голем број на македонски и на француски архитекти, историчари, историчари на уметноста, археолози, љубители на културното наследство и старите урбани јадра, заеднички размислуваа и работеа во служба на  културното наследство.

Проектот започна со партнерската соработка со градот Скопје, со Битола, а од неодамна и со Велес како седиште на нашата Асоцијација на градови со архитектонско наследство. Својата партиципација и ангажман вложија и  Министерството за култура на Република Македонија, Амбасадата на Франција во Македонија, Францускиот културен центар во Скопје, Градот Ангулем, Асоцијацијата Виа Патримуан (Ангулем) и Националната Асоцијација на градови и региони на уметност и историја и градови со заштитени зони. Тука есенцијална беше поддршката и од француското Министерството за култура и комуникација и Министерството за надворешни и европски работи.

Во овој десет годишен период потпишани се три договори (2002/2004, 2005/2007, 2008/2010) помеѓу Министерството за култура на Република Македонија и Амбасадата на Франција, кои се основа и правен доказ за нераскинливото партнерство и пријателство што владее меѓу нашите две земји.

Навистина е голем бројот на реализирните проекти, кои за заеднички именител го имаат вложениот труд од двете држави. Започнувајќи од научни сознанија до сигналитика, од инвентаризација на куќите на старите центри до легислатива и прописи прилагодени на историските квартови, од изложби за културен туризам, размена на експерти и советници во градовите до размена на искуства на европско и светско ниво. Сите овие реализирани активности во изминатата една деценија придонесуваат за продлабочување на знаењата, заштитата на културното наследство и негово значење, во промовирањето на двете држави како интересни туристички дестинации.

Голема е поддршката што ја добивме од француските партнери околу сигналитиката и создавањето на еден нов пристап кон нашето Скопје. Беше изработена студијата за историјата и урбаниот развој на градот, која го истакна значењето на богатото културно наследство,  доближувајќи го истото до туристите преку поставените јарболи, паноа, плочи со текст, слика и цртеж.

За Република Македонија извонредно значаен зафат е и проектот за инвентаризација на Старата скопска чаршија. Оваа активност која   ја реализира Министерството за култура на Република Македонија со Конзерваторскиот центар Скопје и Заводот за заштита на спомениците за култура и музеј во Битола придонесе за дефинирање на  заштитените зони и усогласување на  правната регулатива. Првата фаза од проектот е финансирана од страна на француските партнери, втората фаза ќе ја финансираат француската асоцијација и Министерството за култура на Република Македонија, а третата ќе биде финансирана исклучиво од македонското Министерство за култура.

Токму во насока на заштита на големата вредност на Старата скопска чаршија како културно богатство, во 2008 година беше  донесен и Закон со кој се уредуваат клучните праша-ња во поглед на практичните аспекти на заштитата на споменичната целина, а формиран е и Национален совет , како  координативно и советодавно тело на Владата на Република Македонија, чија задача е донесување на петгодишна програма за ревитализација на овој значаен предел.

За одбележување е и македонско-француската соработка во областа на размената на експерти, идеи и искуства, размена на советници во општините и на стручни лица, како и одржувањето на регионални семинари кои придонесоа за навистина големо продлабочување на нашата соработка.

Во оваа прилика, би ги поздравила и одличните резултати од формирањето на Асоцијацијата на градови во Македонија со архитектонско наследство, чија што цел беше обединување на повеќе градови, заеднички ангажман за изнаоѓање средства и субвенции за реставрација, заштита и промовирање на културното наследство, а со тоа и развој на локалната економија.

Партнерството со Република Франција до толку е позначајно и поради фактот што денес со напливот на различните толкувања за она што е „модерно”, на  квалитетните урбани јадра преку нови градби и лоши реставрации им се заканува вистинска преобразба.Затоа заедничката работа врз правната регулатива, документите за урбанизам и инвентаризација се приоритетните активности на  Министерството за култура во оваа партнерство.

Ја користам оваа прилика да им се заблагодарам на нашите пријатели од Франција, г-ѓа Марилиз Ортиз, директор на Националната Асоцијација на градови и региони на уметност и историја и градовите со заштитени зони, Асоцијацијата Виа Патримоан за валоризација на културното наследство на градот Ангулем и областа Ангумуа, на Францускиот културен центар во Скопје, Министерството за култура и комуникација на Франција, Амбасадата на Франција во Скопје за досегашната успешна соработка, која убедена сум дека ќе продложи и во иднина. Бидејќи грижата за културното наследство е наша заедничка обврска, наш белег на препознатливост, она што не прави и различни и посебни, но и она што не зближува и не поврзува со светот.

Ви благодарам на вниманието.