ЈУБИЛЕЈ НА МУЗИКАТА - X ИНТЕРНАЦИОНАЛЕН ФЕСТИВАЛ ПОЛИХИМНИА 2025
Од 11.04 - 15.04. 2025 год. во Скопје по десетти пат се одржа Интернационалниот фестивал на класична музика Полихимниа 2025. Единствен од ваков вид во нашата земја и оригинален по својата содржина и оваа година фестивалот се обиде да ги обедини најдобрите музичари и уметници од регионот и пошироко. Во рамки на фестивалот се одржаа меѓународен натпревар за сите инструменти и камерна музика, семинари и концерти.
Фестивалот ја започна својата историја во 2016 година како Фестивал и натпревар по камерна музика и флејта за веќе од наредната година да прерасне во една голема манифестација која во натпреварувачкиот дел ги содржи сите музички дисциплини и инструменти.
Идејните творци на оваа манифестација - Николина Е.Тодоровска - проф. по флејта и камерна музика и Верица Шотаровска - проф. по пијано и камерна музика со секој изминат фестивал создаваа бренд кој стана препознатлив на овие простори и пошироко и кој стана синоним за вистинска уметност, знаење и професионалност. Овој фестивал ги надмина границите на балканските земји и во неговата реализација се вклучија еминентни имиња од многу европски земји ( Италија, Франција, Шпанија, Германија ,Турција, Велика Британија, Романија ) како и од САД.
Низ сите овие години се одржаа многу концерти и стручни предавања од областа на класичната музика и едукација, а учениците имаа можност преку семинари и мастер класови да работат со исклучителни педагози на својот инструмент.
Овој фестивал освен што го негува македонското творештво со награда за најдобро изведено дело од македонски автор, годинава додели и признание за најдобро изведена композиција од нашиот еминентен композитор Томислав Зографски, која традиционално ја доделува Фондацијата Томислав Зографски и која оваа година ја доби виолинистката од Македонија Божана Гошева која воедно беше едногласно избрана и за Лауреат на натпреварот.
На гала концертот на најдобрите натпрварувачи што се одржа на 13.04.2025 год. Во Музејот на македонската борба, во атмосфера на многу емоции и бурни овации за изведувачите, беа доделени следниве награди
Лауреат - Божана Гошева - виолина
Лауреат 2 - Јован Муратовиќ - виола
Лауреат 3 - Магдалена Комилоска - флејта и Ева Малиновска - виолончело
Најдобар млад изведувач - Дамјан Атанасов - пијано
Најдобра изведба на македонски дела
- Божана Гошева - виолина и награда од фондација Томислав Зографски за изедба на T. Zografski - Song for solo violin
- Мила Манчев - пијано за изведба на Ристо Аврамовски - Трета исповедна молитва
- Александра Каракачанова - флејта за изведба на Александар Џамбазов – Хумореска
Годинава мастер клас одржа проф. Аленка Зупан - флејта од Копер, Р. Словенија, Марко Зупан – флејта од академијата во Сплит, Р.Хрватска и нашиот соло пејач Михаило Арсенски кој работи во Германија. Солистички концерти одржаа дуото Минка Поповиќ – пијано ( Австрија ) и Марко Зупан – флејта ( Хрватска / Словенија ) како и македонскиот уметник Бојан Петковски – гитара.
Уметноста а посебно музиката е најдобриот амбасадор на една земја а манифестации од ваков вид, кои ја носат европската уметност, музика и знаење на македонските подиуми треба да бидат подржани од државата и културата на една земја која сака да биде дел од европското па и светско музичко милје. Министерството за култура го препозна тоа и годинава го поддржа ова јубилејно издание.
Музиката како дел од културата и уметноста ги надминува политичките, етничките и граничните бариери. Таа ги прифаќа различните дострели на националните и етнички колективи и ги интегрира во еден континуиран и безвременски уметнички процес.
Полихимниа беше и овој пат нашата " музичка Европа " во Македонија.
https://ekran.mk/jubilej-na-muzikata-x-internatsionalen-festival-polihimnia-2025/
