Дали погледот на целулитот на Ким Кардашијан е вашиот краен хоризонт - беше едно од прашањата што им го постави на студентите името и презимето во екс ЈУ-новинарството

„Кои сте, бре, вие луѓе? Што е вашата генерација? Која е вашата песна? Слоган? Што пишува на вашиот беџ? Кому му верувате? На што се воодушевувате? Против што сте, за што сте? Што менувате? Кои се вашите книги? На што се радувате? Кои се вашите идни класици? Која е причината за вашето постоење? Зошто сте на овој свет? Зар се помирувате со судбината на генерации произведени во триминутна аритмична средба на несреќниот сперматозоид и расплаканата јајце-клетка? На кого и што отплаќате со ваква судбина? Зошто се долговите ваши кога не сте ги направиле? Зар во вашата генерација Че го уби Фидел? Дали сакате генерациски да бидете проколнати, незначајни, кусур на историјата? Да личите на нас?

Дали погледот на целулитот на Ким Кардашијан е вашиот краен хоризонт? Вашите хиперпалци, развиени од ес-ем-есот, вашиот Голем брат, Пахомиј и прељубници, медиумски наметнати идеално-типски идоли со ист број пајкини усни и идентични вимиња, пазарени од монотоната полица на ИКЕА; зар тоа е се' што можете генерациски? Што смеете? Овие по војната, пред вас, ги видоа „Битлси“, Кенеди, Виетнам, Мухамед Али, ‘68, Вудсток, деца на цвеќето, црни браќа, Брандо, позата 69, Селинџер, нашата „Златна палма“, нобеловецот Андриќ, спуштањето на Месечината, Олимписките игри на Јахорина, транзисторот, Бил Гејтс, телевизија во боја, Мерилин Монро, компјутери „комодоре“, Дилан, крајот на СССР, Зоран Радмиловиќ, море, маратонци, Шон Конери, Црвена ѕвезда како првак во светот, смртта на Тито, далечински управувач, крајот на апартхејдот, нашето злато во кошарка, Џаиќ, „Конкорд“, Пикасо, првиот дел од „Кум“, це-де, падот на Берлинскиот ѕид, Арсен Дедиќ, отворање на Кинескиот ѕид, Бугарија во Европската унија, покриениот храм „Свети Сава“, граѓанската војна и распаѓањето на Југославија. Дали ја гледате разликата? Зошто се согласувате со неа? Зошто, неописливо млитаво, се согласивте по претходната, силициумска генерација да бидете нем силиконски род?

Утешно. Засега.

Не сте виновни што сте такви. Ничија генетика не е толку лоша. Вас ве препарираа. Вие сте експонати. Заморчиња. Прво, комунизмот и долготрајната транзиција го уништуваат генерацискиот и поединечен интегритет. Без интегритет, нема личност. Без личност, нема граѓанска храброст и одговорност. Без граѓанска храброст и одговорност, нема демократија. Конечно, недостатокот на интегритет и недостатокот на писменост даваат вакво српско новинарство. Српското новинарство ентузијастички се вклучува во дресура на српското јавно мислење придонесувајќи за атмосфера каде што се' е можно…

Таблоидната политика неминовно раѓа таблоидна економија, потоа таблоидна уметност, потоа таблоидно новинарство, и, конечно, таблоиден живот со десет часа дневно замајување со телевизиска програма. Каква и да е, ако Србија ја нема РТС, сите ќерки би биле како Стоја, и сите синови како заштитени сведоци. Тоа не е случајно. Тоа е нечиј политички проект, се' во Србија да се сведе на вечни непродуктивни конфликти и исконска војна на нашиот Шоиќ и нивниот султан Сулејман. Кисмет, претпоставувам...“

(Дел од предавањете пред студентите по новинарство во Белград, кое беше објавено и во „Утрински весник“ во ноември 2012)