ТРОПАРИ НА СВЕТИТЕЛИТЕ И ПРАЗНИЦИТЕ
Тропар на светиот
Христов рамноапостолен
Епископ Ерополски
Аверкиј
22 октомври / 4 ноември
Божји угодниче, Аверкие свети милостив,
незнаењето човечко го исплака,
заблудата кон идолите ја разруши со силата Христова,
адот пред тебе глава наведна,
и по твоите молитви мноштво души
Спасителот при себе удоми, пастиру Божји,
како на земјата, така сега и на небесата
спомни си за нашите имиња.
Извор МПЦ – ОА
Манастир свети Јован Претеча Слепче
Тропар во чест на
Казанската Икона на Мајката Божја
22 октомври / 4 ноември
глас 4
Усрдна Застапничке, Мајко на Севишниот Господ,
Која Го Молиш за сите Синот Твој,
Христос нашиот Бог и правиш да се спасат
сите кои прибегнуваат кон Твојот моќен Покров.
Застапи се, о Госпоѓо, Царице и Владичице,
за сите нас кои сме во напасти и неволји,
обременети од гревовни болести,
кои стоиме и се молиме со солзи пред Тебе
со умилна душа и скрушено срце,
имајќи цврста неповратна надеж
во Тебе пред Пречистиот Твој Образ,
подари им избавување од секое зло
и на сите она што им е полезно,
и спаси ги сите Богородице Дево,
зашто ти си Божествен Покров на слугите Твои.
Извор МПЦ –ОА
Тропар на светите
Христови маченици
Александар епископ, Ираклиј војник
и четири жени: Ана, Елизавета,
Теодора и Гликерија
22 октомври / 4 ноември
Следејќи Го Христа и крстот свој носејќи го,
на голгота Александре свети епископе,
свита поведе кон спасение пред Господа:
Ираклиј – кој небесен војник постана,
Ана, Елизавета, Теодора и Гликерија,
кои миомир маченички од душите
свои пред Бога принесоа.
Затоа свети маченици сега и за нас спомнете
си пред Началникот на животот.
Извор МПЦ – ОА
Манастир свети Јован Претеча Слепче
Тропар на преподобниот
отец Руф исихаст
22 октомври / 4 ноември
Ревноста твоја да Го следиш Патот,
благодатно кон познание на Бога те приведе,
о, свет безмолвниче Руфе,
каде на страв Божји учејќи се,
во молитвено тихување твоето срце го потопи.
Спомни нѐ и сега во твоите молитви пред Господа
и заштити нѐ од нашето злопамтење и високоумие.
Извор МПЦ – ОА
Манастир свети Јован Претеча Слепче
Тропар на преподобниот
отец Лот Египетски
22 октомври / 4 ноември
Радувај се во Господа свети Лоте,
оче преподобен, кој во молитвата
огнен столб постана од земјата до Небото,
и застапи се за нас пред Христа Господа,
ти кој наставник на монасите стана
и мноштво души при Господа
приведе за нивно спасение.
Извор МПЦ-ОА
Манастир св Јован Претеча Слепче
Православен календар за 04/11/2024
ТРОПАР
Тропар (грч. τροπάριον, цсл. тропа́рь) е кратка црковна молитвена песна, настаната во доцниот стадиум на химнографијата. Тропарот ја содржи суштината на празникот за кој е напишан и во кој се прославува светителот; во Канонот, тропарот следи после ирмосот. Често се однесува и на аполитикион (грч. απολυτίκιον), или отпустителна химна преку која се опишува главната тема на богослужењето на денот, а со која се завршува Вечерната богослужба.
Богородичен (теотокион) е посебен вид на тропар, кој е посветен на Пресвета Богородица. Помали варијации во Богородичниот водат кон Крстобогородичен (ставротеотокион), посебен вид на тропар посветен на страдањето на Пресвета при распнувањето на Христос на Крстот, и како таков најчесто се користи во среда и петок, денови кога Црквата се сеќава на чесниот Крст Господов.
Понекогаш тропарот се користи како рефрен помеѓу читање на стихирите.од Псалмите, иако примарната функција во тој случај ја имаат стихирите.
Тропарник се нарекува една засебна целина во книга со тропари и кондаци, за секој ден на Црковната литургиска година.
ПреминПортал
2024 лето Господово
Од Верскиот календар:
Свети Аверкиј Рамноапостолен
Во времето на царот Антонин Св. Аверкиј беше епископ во градот Јерапол Фригиски. Во тој град огромното мнозинство беа незнабожци, а Св. Аверкиј управуваше со своето малечко стадо и тагувајќи во срцето заради толкавото мноштво незнабожци и идолопоклоници усрдно Му се молеше на Бога да ги обрати кон светлоста на вистината. Во времето на едно прочуено идолско празнување, Аверкиј се распали со ревност по Бога, па влезе во идолскиот храм и ги испокрши сите идоли. Кога разјарените незнабожци сакаа да го убијат, во тој миг припаднаа пред него тројца бесни млади луѓе со пена на усните и со урлање, а Божјиот човек со молитва ги изгони од нив демоните и момчињата станаа здрави и мирни. Кога го видоа тоа, незнабожците го свртеа својот гнев во восхит кон Христовиот чудотворец и веднаш петстотини од нив примија Крштение. Малку по малку целиот град Јерапол поверува во Христа и се крсти. Антипатот на таа област, Публиј, имаше слепа мајка на којашто Аверкиј со молитва ѝ го врати видот, та поверуваа во Бога Публиј и неговата мајка и мнозина други луѓе. На старост беше повикан во Рим, каде што ја исцели од лудило царската ќерка. Неколкупати на овој Свој верен следбеник му се јавуваше Господ Исус Христос. Од далеку и од околината кај него доаѓаа луѓе заради неговата чудотворна помош при нивните неволји. Демоните не само што се плашеа од него туку кога им заповедаше и му служеа. На заповед на Самиот Господ го проповедаше Евангелието и во Сирија и во Месопотамија. Пред својот љубен Христос се престави во длабока старост, во градот Јерапол, на крајот од 2 век.
