ТРОПАРИ НА СВЕТИТЕЛИТЕ И ПРАЗНИЦИТЕ
Тропар на светиот маченик
Георгиј Кратовски
26 мај / 8 јуни
Благодатта Христова бргу ги оживува
нашите души умртвени,
по твоите свети молитви,
о Гергие свети новомачениче,
затоа народите итаат кон твоето свето име,
кое Бога Го прослави,
девственоста и чистотата ги возвеличи,
и за сите нас спасение од Спасителот измолува,
за секој кој во Него ќе поверува.
Извор МПЦ – ОА
Манастир свети Јован Претеча Слепче
Тропар на светиот
Христов aпостол Карп
26 мај / 8 јуни
Пред Господа се претстави,
ти избран саду во кого нема лукавство,
ти ревнителу во кого видовме вера чиста непорочна,
Карпе свети апостоле, моли се за нас свети мачениче,
по твоите свети молитви да се спасат нашите души.
Извор МПЦ – ОА
Манастир свети Јован Претеча Слепче
Тропар на светите
Христови маченици
Аверкиј и Елена
26 мај / 8 јуни
Круна станавте на лозата ваша о, Аверкие и Елено
и украс на Црквата Христова
која на крвта маченичка се воздига.
Молете се пред Господа вие свети страдалници,
едно стадо со Еден Пастир да останеме
и верата чиста да ја запазиме.
*Деца на св. апостол Алфеј, а родени брат и сестра
на св. апостоли Јаков Алфееф и Матеј Евангелист.
Извор МПЦ – ОА
Манастир свети Јован Претеча Слепче
Тропар на преподобниот отец
Јован Психаит
26 мај / 8 јуни
Потоци солзи изли блажен Јоване
за вистината чиста да се проповеда
и ревност мажествена покажа
во исповедување на иконите свети.
Заштити нѐ Господи по молитвите на преподобниот,
кој закрилен со благодатта Твоја,
мноштво победи однесе над демоните
со неговото смирение,
во слава на светото име Твое.
Извор МПЦ – ОА
Манастир свети Јован Претеча Слепче
Тропар на светиот
Христов новомаченик
Александар Солунски
26 мај / 8 јуни
Го доврши делото Исаково, раце подавајќи кон Христа,
со покајничко исповедување, одговор од Небесата дочека:
да, простено но и со венец маченички наградено,
о, Александаре свети покајниче.
Моли се за нас пред Оној Кој има милост неисцрпна
за оние кои се враќаат при Отецот Небесен.
извор
МПЦ - ОА
Манастир Св. Јован Претеча Слепче
Од Верскиот календар на МПЦ (08.06.2024)
ТРОПАР
Тропар (грч. τροπάριον, цсл. тропа́рь) е кратка црковна молитвена песна, настаната во доцниот стадиум на химнографијата. Тропарот ја содржи суштината на празникот за кој е напишан и во кој се прославува светителот; во Канонот, тропарот следи после ирмосот. Често се однесува и на апокалиптик (грч. απολυτίκιον), или отпустителна химна преку која се опишува главната тема на богослужењето на денот, а со која се завршува Вечерната богослужба.
Богородичен (теотокион) е посебен вид на тропар, кој е посветен на Пресвета Богородица. Помали варијации во Богородичниот водат кон Крстобогородичен (ставротеотокион), посебен вид на тропар посветен на страдањето на Пресвета при распнувањето на Христос на Крстот, и како таков најчесто се користи во среда и петок, денови кога Црквата се сеќава на чесниот Крст Господов.
Понекогаш тропарот се користи како рефрен помеѓу читање на стихирите.од Псалмите, иако примарната функција во тој случај ја имаат стихирите.
Тропарник се нарекува една засебна целина во книга со тропари и кондаци, за секој ден на Црковната литургиска година.
ПреминПортал
2024 лето Господово
Од Верскиот календар:
Светиот апостол Карп
Еден од Седумдесеттемина. Следбеник и придружник на Светиот апостол Павле, од кого беше поставен за епископ на Верија Тракиска. Но го проповедаше Евангелието и на Крит, каде што го прими во својот дом Св. Дионисиј Ареопагит. За него Свети Дионисиј сведочи дека бил човек украсен со чист ум, кротост и незлобливост и дека во визија му се јавил Самиот Господ Исус Христос со Своите ангели и никогаш не ја почнувал Светата Литургија ако немал претходно небесно видение. За името Христово претрпе многу напасти. Најпосле пострада од неверните Евреи коишто го убија, па се пресели со душата во Царството Божјо за вечно да се насладува гледајќи Го Господ во слава.
Светиот апостол Алфеј
Татко на двајца апостоли од Дванаесеттемина, на Јаков Алфеев и Матеј евангелистот. Мирно се упокои.
Преподобен Јован Психаит
Од светот се оддалечи рано во младоста и се повлече во Психаитската Лавра во Цариград. Таму заради љубовта Христова се подвизуваше многу години. Во 8 век претрпе прогонство поради иконопочитување.
Светиот новомаченик Александар Солунски
Овој Христов маченик беше роден во времето на големата турска тиранија над Солун. Како млад беше прелажан од Турците и потурчен. Во почетокот не го гризеше совеста за таа постапка и тој појде на Ќаба со останатите мухамедански аџии, па стана дервиш. Но како дервиш во Солун почна горчливо да се кае. При ова каење дојде на мисла дека со ништо не може да го симне од себе страшниот грев на христоотстапништво, освен со својата крв. Кога значи се покаја и се реши на мачеништво, излезе пред Турците како христијанин. Турците го фрлија в затвор и го подложија на долги маки. Но Александар постојано викаше: „Како христијанин се родив и како христијанин сакам да умрам!“ Најпосле Турците го осудија на смрт, на што покајаниот Александар многу се израдува, познавајќи од тоа дека гревовите му се простени и дека Бог ја прима неговата жртва. Беше заклан во Смирна во 1794 година и прославен во Црквата небесна и земна.
Пренос на моштите на свети Георгиј Кратовски
Македонец, од градот Кратово. По занает златар. Во срцето и со сета душа христијанин. Имал осумнаесет години кога Турците сакале да го потурчат, но останал тврд во верата како прекрасен дијамант. Тогаш Турците го мачеле со најлути маки и најпосле жив го запалиле. Пострадал за Христос на 11 февруари 1515 година во Софија, за време на владеењето на царот Селим и се прослави со невенлива небесна слава. На овој ден се празнува пренесувањето на неговите мошти.
