НАЈГОЛЕМИОТ СВЕТСКИ ИЗДАВАЧ ГО ОБЈАВИ "СЕСТРАТА НА ЗИГМУНД ФРОЈД" ВО АМЕРИКА

Вашингтон Пост пишува за Гоце Смилевски!

"Како Толстој, Гоце Смилевски избира едноставни зборови и ги поврзува така елоквентно што тие создаваат моќни и комплексни слики, идеи и чувства", вели критичарот Николас Мејер од Форуард

Во историјата на Македонија досега немало млад македонски писател што така силно одекнал во светот како Гоце Смилевски. Деновиве угледни американски весници како "Вашингтон Пост" и најважните книжевни медиуми како "Лајбрари Џурнал", "Буклист", "Паблишерс Викли", објавуваат позитивни критики за романот "Сестрата на Зигмунд Фројд", што неодамна го објави најголемиот светски издавач "Пингвин" од Њујорк.

"Вашингтон Пост" истакнува дека "Сестрата на Зигмунд Фројд" е "роман со голема длабочина чија поетска проза зрачи со иста сила и преку преводот на англиски јазик". Откако ќе констатира дека "како Толстој, Гоце Смилевски избира едноставни зборови и ги поврзува така елоквентно, што тие создаваат моќни и комплексни слики, идеи и чувства", критичарот Николас Мејер во неделниот весник "Форуард" подвлекува: "Ретко уметничко достигнување кое е мудро, проникливо и длабоко поттикнувачко".

Познатата американска теоретичарка Шошана Фелман, долгогодишен професор на Универзитетот Јејл, за "Сестрата на Зигмунд Фројд" вели: "Ингениозен, иновативен и длабок во нарацијата, овој роман претставува ангажирано читачко искуство за секој што се грижи за суштината на нашиот свет." Романсиерот Џеј Парини за делото на Смилевски пишува: "Ова е еден од оние ретки романи кои прават многу повеќе од тоа да ја донесат историјата во живот. Овој роман им дава живот на фактите и блеснува со оној вид на вечно актуелна реалност, што го прави да изгледа повистинит и од самиот живот".

Едвард Кон во "Лајбрари Џурнал" истакнува дека "Сестрата на Зигмунд Фројд" е роман со висок интелект, кој ентузијастички треба да се препорачува на сите интелигентни читатели каде и да се во светот.

За овој роман Смилевски во 2010 година ја доби Наградата за литература на Европската унија. Делото се преведува на 30 јазици во светот.

Скапоцен камен од книга
Критичарката на "Буклист" Бриџет Торесон оценува дека "Сестрата на Зигмунд Фројд" е роман кој "открива високи и универзални вистини за темната страна на човечката природа". Месечникот "Паблишерс Уикли" романот на Смилевски го вреднува како "скапоцен камен од книга", а магазинот "Киркус" како "супериорно дело".

(Де.Т.)-Вечер