Министерката за култура Елизабета Канческа-Милевска рече дека во изминатите 12 години Министерството го поддржало престојот на стотина македонски уметници во светската престолнина на уметноста кои, како што рече, ги збогатиле своите искуства, воспоставиле многубројни контакти и соработки со релевантни галерии и институции ... \
Во галеријата Чифте амам попладнево беше отворена изложба на дела од македонски уметници кои од 2002 до 2014, со поддршка на Министерството за култура, биле на двомесечен студиски престој во Меѓународниот град на уметностите во Париз (Cite internationale des Arts). Изложбата е насловена „Париз, те сакам“ и е организирана по повод Светскиот ден на франкофонијата.
- Нема подобар начин да се одбележи франкофонијата од ова претставување. Врската со Париз и со културната разновидност со оваа изложба станува бесмртна и неа може да им ја пренесеме на идните генерации. Меѓународниот град на уметностите постои од 1965 година и досега има примено 15.000 уметници. И Република Македонија има свое студио во кое престојувале и твореле околу сто македонски уметници - рече амбасадорката на Франција во Македонија, Лоренс Оер.
Министерката за култура Елизабета Канческа-Милевска рече дека во изминатите 12 години Министерството го поддржало престојот на стотина македонски уметници во светската престолнина на уметноста кои, како што рече, ги збогатиле своите искуства, воспоставиле многубројни контакти и соработки со релевантни галерии и институции и ја презентирале својата уметност пред француската и европската публика.
- Македонската ликовна сцена беше претставена преку творештвото на нашите реномирани уметници, како: Глигор Чемерски, Коле Манев, Рубенс Корубин, Жарко Башевски, Решат Амети, Роберт Јанкуловски, Антони Мазневски, Јован Шумковски, Илија Пенушлиски, Синиша Кашавелски, Нехат Бекири, Константин Качев и многу други автори кои ја афирмираа македонската уметност и ја вброија во редот на земјите кои со големо внимание ја промовираат сопствената култура во меѓународен контекст. Благодарение на Договорот кој Министерството за култура на Република Македонија во 2002 го потпиша со Меѓународниот град на уметности, уште многу македонски уметници до 2060 година ќе имаат можност да се претстават во македонското ателје - рече Канческа-Милевска.
На амбасадорката Оер таа и врачи благодарница за Симон Брино, почесен претседател на Фондацијата „Меѓународен град на уметностите - Париз“ за нејзината поддршка во презентацијата на македонските уметници во тој центар.
Изложбата е дел од голем број проекти што се реализирани по првата потпишана Програма за соработка меѓу Македонија и Франција во 2010 години. Таа е дел и од повеќе активности со кои се одбележува Светскиот ден на франкофонијата (20 март). Република Македонија од 2006 година е полноправна членка на Меѓународната организација на франкофонијата.
- Нашата земја со голема посветеност, во континуитет ги промовира целите и принципите на Меѓународната организација на франкофонијата. Со останатите 77 држави и влади кои се членки и земји-набљудувачи во организацијата настојуваме да ги афирмираме човековите права и културната разновидност... Република Македонија редовно партиципира во сите иницијативи на меѓународната организација, меѓу кои е и учеството на Франкофонските игри на кои досега имавме забележителни настапи и неколку признанија - рече министерката за култура.
Амбасадорката Оер соопшти дека одбележувањето на франкофонијата оваа седмица ќе има и други содржини - Недела на франкофонски филм, натпревар во француски шансони и театар, а најави и дека наскоро ќе биде објавен каталог за француската колекција што ја поседува Музејот на современата уметност во Скопје.
Извор: Министерсво за култура на РМ
