Светиот Гроб е затворен од средата, 25 март 2020, за една седмица, заради заштитни причини, поради епидемијата на коронавирусот.

Затворањето на Храмот било одлучено по средбата што се одржала меѓу претставници на израелската полиција и претставниците од црквите, рекол Уади Абу Насар, претставник на Синодот на католичките епископи на Светите Места, откако израелската влада претходно донесла построги мерки, со цел да се спречи ширењето на вирусот.

„Она што го разбравме е дека оваа наредба важи за една недела, иако никој не знае колку време ќе трае оваа криза“ – рекол Насар.

Абид Џудех, Палестинец, чијашто фамилија чува еден од клучевите на храмот, го потврдил ова решение преку Фејсбук.

Некој фоторепортер од Француската агенција рекол дека ги видел властите како го затвораат Храмот во 5 часот попладнето.

Затворањето на Храмот се случува додека Христијаните од сите деноминации се подготвуваат за Пасха, период кога вообичаено илјадници поклоници и туристи притекнуваат во Ерусалим, чиишто улици сега се речиси пусти. Пасхата на Римокатолиците оваа година се паѓа на 12 април, а на Православните една недела подоцна.

Абу Насар рекол дека „ако, не дај Боже, оваа состојба се одолговлечи и стигнеме до периодот на Пасха“, црковните власти се надеваат дека ќе се најде некое решение, за да би можело да се служат Богослужбите од Страната Недела и да би се прославило Воскресението, веројатно ограничувајќи го бројот на присутните во храмот.

Израелските власти вчера побарале да се затворат и сите синагоги, а молитвата да се одвива на отворено, без собирање на повеќе од 10 луѓе секој пат. Исто така, еврејските верници биле повикани да не ги целиваат камењата од древниот ѕид, на крајот од Гората на Храмот. Оваа недела престанеле и сите молитви во муслиманскиот храм Ал-Акса. 

https://bigorski.org.mk/vesti/svet/zatvoren-svetiot-grob-hristov-vo-erusalim/