...Што е смислата на ХРИСТИЈАНСТВОТО и ПОРАКАТА на Светото Писмо во овој СВЕТ.
Па прочитајте и размислете!
------------

1. Една од темелните вистини, со која се среќаваме во Светото Писмо (Библијата), е вистината дека нашиот Творец, Отецот и Синот и Светиот Дух, не го создал злото и смртта и не ја прифаќа пропаста на живите и животот.
Тој создал се' за живот, за постоење! И се' во овој свет, но и во сите димензии на постоењето, постои за да го одржува тој ЖИВОТ.
(Види: Јован. 1, 1 - 51; Прва книга Мојсеева. 1, 1 - 17)

2. Откако во духовниот/ ангелски свет се случи големата трагедија - бунтот на завидливиот светлоносен херувим/ ангел, а по овој настан и неговото отпаѓање, а потоа од неговата болна состојба испровоцираната појава на злото, гревот, духовната смрт и адот (пекол, состојба во која се отпаднатите ангели /демони) - нашиот Творец внимаваше и опоменуваше човештвото да не се зарази со најопасниот отров што постои во универзумот, со ЗЛОТО
(Види: Прва книга Мојсеева. 1, 17).

3. Но, поради непослушноста кон Творецот, а излажани од злоизворникот - сатаната, прародителите на човештвото се заразија со ЗЛОТО и тоа во нив предизвика ДУХОВНА СМРТ.
А духовната смрт во нашите прародители Адам и Ева се пројави преку:
- губење на животоодржувачкото - благодатно - единство со Творецот
- губење на можноста за стекнување вечно постоење/ бесмртност,
- губење на совршената состојба на постоење за која беа создадени - Царството Божјо,
а како последица на духовната смрт настана смртта на телото, биолошката смрт.
(Види: 1. Мојсеј. 3, 1 - 24; 5, 5; 1. Коринт. 15, 21 - 23)

4. Од моментот на отпаѓањето на Адам и Ева од рајската доброподобна состојба на постоење, а преку нив и на целото човештво, нашиот Творец, нашиот Небесен Отец, промислуваше како човештвото да го спаси од отпаднатата состојба на постоење, да го СПАСИ и ОСЛОБОДИ од: злото, гревот, духовната и биолошката смрт и од робството на демонски сили.

Целото Свето Писмо, сите свети книги од кои е составено, како од периодот на Стариот Завет (од Адам, Ное, Авраам, Мојсеј, Пророците)
така и од периодот на Новиот Завет (од вочовечувањето и мисијата на нашиот Господ и Спасител Исус Христос) ни сведочат за ова спасоносно дело Божјо.

- пророштво за тоа како ќе изгледа делувањето на Месијата/ Христос од пророкот Исаија. 53. 1 – 12; Ова пророштво е запишано 740 години пред доаѓањето на Спасителот!

„Тој беше презрен и отфрлен меѓу луѓето, човек на болки и свикнат на страдања, и ние го одвраќавме од Него лицето свое; Тој беше презиран, и ние за ништо не Го сметавме. Но Тој ги зеде врз Себе нашите болки и ги понесе нашите слабости; а ние мислевме дека Тој беше поразуван, казнуван и понизуван од Бога. А Тој беше изнаранет за нашите гревови и мачен заради нашите беззаконија; казната за нашиот мир падна врз Него, а преку Неговите рани ние се излекувавме.“

- пророштво за тоа каде ќе се роди Месијата од пророкот Михеј. 5, 2; Запишано 742 години пред доаѓањето на Спасителот!

„И ти, Витлееме Ефратов, иако си најмал меѓу илјадниците Јудејци, од тебе ќе ни излезе Оној, Кој треба да владее во Израилот и чие потекло е од почетокот, од вечноста.„

- зборови на Месијата запишани во евангелието според апостол Јован. 3, 13 - 21)

„Никој не се искачил на небото, освен Оној Кој слезе од небото, Синот Човечки, Кој е на небото. И како што Мојсеј ја подигна змијата во пустината, така треба да се издигне и Синот Човечки, та секој што верува во Него да не загине, но да има живот вечен. Зашто Бог (Небесниот Отец) толку го возљуби светот, што Го даде Својот Единороден Син (своето совечно Слово/ Логос/ Син Единороден), та секој што верува во Него да не загине, туку да има вечен живот. Зашто Бог не Го испрати Својот Син во светот за да му суди на светот, туку светот да се спаси преку Него. Кој верува во Него - нема да биде суден, а кој не верува, тој е веќе осуден, зашто не поверувал во името на Единородниот Син Божји. А овој суд е затоа што Светлината дојде на светот, но луѓето повеќе ја засакаа темнината отколку светлината, зашто нивните дела беа зли. Зашто секој, што прави зло, ја мрази светлината и не оди кон светлината, за да не бидат разоткриени неговите дела бидејќи се лукави. А оној што твори вистина, оди кон светлината за да се видат неговите дела, бидејќи се по Бога извршени.“

Врвната вистина од ова дело Божјо, е ВИСТИНАТА дека нашиот Небесен Отец преку Исус од Назарет - кој е Христос (Месија/ Помазаник), Син (Слово/ Логос) Божји - односно, преку Неговата искупителна и спасителна мисија која се оствари преку:

а. објавувањето на вистината (евангелие - радосна веста) за тоа зошто постоиме и што треба да направиме за да стекнеме вечен живот, односно да го стекнеме Царството Божјо;
б. победата над злото и сатаната остварена на крстот со безграничната жртвена љубов кон секој човек и со победата над смртта со воскресението, му ОВОЗМОЖИ на ЦЕЛОТО човештво спасение, ослободување од духовното робство.

5. И затоа Победникот, Спасителот на светот, нашиот Исус (Јешуа), нашиот Христос/ Месија (Машиах) - со потполна власт му објави на целото човештво:

"Јас сум воскресение и живот; кој верува во Мене (кој ќе ја прими во својот живот горенаведената вистина и со неа ќе го осмисли и исполни својот живот), и да умре (се мисли на телесната смрт) ќе живее." (се мисли на животот на душата/ личноста по телесната смрт и на воскресението - оживувањето на телото - пред второто доаѓање на Месијата, како Судија на целото човештво) (Јован. 11, 25).

6. Затоа Едната, Света, Соборна и Апостолска Црква - новозаветниот народ Божји/ учениците Христови - предводени отпочеток од апостолите, а потоа од епископите и презвитерите - веќе над двеилјади години со полна увереност кај сите народи ја сведочи Радосната вест (евангелието) за победата над злото, гревот, смртта и сатаната!
Но, пред се, ја сведочи МОЖНОСТА секој човек - додека е во тело и во овој свет - преку верата во Христос/ Месијата, преку крштевањето, преку примањето на силата на Светиот Дух, преку причестувањето со Телото и Крвта на воскреснатиот Спасител и преку исполнување на Неговите заповеди и водење на спасителен духовен живот, уште во овој живот да ја спознае вистината за вечниот живот и за смислата на постоењето.

7. Пророштвата на пророците од Стариот Завет за доаѓањето на Месијата се исполнија.
Пророштвата на Месијата за Неговото крсно страдање, за воскресението, за вознесението/ враќањето кај Отецот Небесен, за симнувањето на Светиот Дух, за разрушувањето на старозаветниот Храм во Ерусалим - се исполнија.
Пророштвото за тоа како ќе се развива историскиот тек на човештвото и Црквата од Неговото прво доаѓање до Неговото второ доаѓање - е во процес на исполнување.
Очекуваме да се оствари и пророштвото за:
а. Неговото второ доаѓање - како Судија на целото човештво,
б. за воскресението - оживувањето на телата на упокоените и нивно соединување со душите,
в. за крајот на светот - ваков како што ние го познаваме
и за почетокот на совршаната состојба на постоење - Царството Божјо и за вечниот живот во тоа Царство - на сите оние што ќе бидат спасени, односно, ќе го поминат судот Христов.

Пред нас е ИЗБОРОТ!

Или ќе се вратиме кај нашиот Творец и Отец Небесен во Неговата совршена состојба на постоење, во Царството Божјо,
или од Него даруваниот живот ќе го истрошиме до степен во кој ќе се самозаборавиме - кои сме и зошто сме!

презвитер Ивица Тодоров

Јуни, лето Господово 2015