Уште од времето на отец Гаврил Светогорец, Епископ Велички, стана традиција да се одржуваат сеноќни бденија во храмот посветен на преподобната Параскева во Скопје.
Бденијата се прават по повод големите  Господови и Богородичини празници и за другите  големи светители со кои сеноќни служби  Црквата им оддава почит. Традиционално во Св. Петка на 31 деќември и во чест на  празникот на св. маченик Бонифациј се оддржа сеноќно бдение. Бдението отпочна во 23,30 часот со голема Вечерна , акатист на Пресвета Богородица, голема Утрена  и во раните утрински часови со Божествената  Литургија заврши ова молитвено собрание на кое што служеше   игуменот на Беровскиот манастир Успение на Пресвета Богородица,  отец Фотиј, а на кое се собра   верен  народ од повеќе  градови во Македонија.

 Марко и Ристо членови од црковниот хор „Јован Хармосин“ од Скопје, прекрасно ја водеа певницата и вечерта  можевме да ја почувствуваме убавината на старото  македонско црковно пеење, кое инаку се практикува на певницата во Св.Петка.

Мите со другарите од Тетово и Скопје за прв пат се на бдение, а поседоа малку  и на студената клупа,    бидејќи од озвучувањето службата  се слушаше  и надвор.

По петардите и скопскиот огномет,  се рашири тивката молитвата од бдението.

Светиот маченик Бонифациј

Мачеништвото за Христа од грешникот прави светител. Тоа го покажува примерот на Свети Бонифатиј. Тој најпрво ѝ беше слуга на некоја богата и развратна жена во Рим, Аглаида, со којашто имаше нечиста и незаконска врска. Обајцата беа незнабожци. Еднаш Аглаида посака да има во куќата маченички мошти и да ги чува како амајлија што штити од зло. Затоа го прати својот слуга во Азија, за да најде и да ѝ купи мошти. Бонифатиј зеде со себе неколкумина робови и доста богатство, а при разделбата ѝ рече на својата господарка: „А ако не можам да најдам никаков маченик и ако ти го донесат моето тело, госпоѓо, пострадано за Христа, ќе го примиш ли со чест?“ Аглаида се насмеа и го нарече пијаница и грешник. Така се разделија. Кога дојде во градот Тарс Бонифатиј виде мнозина христијани на маки: едни со отсечени нозе, други без раце, трети избодени, четврти на бесилки итн. Нему му се измени срцето, се покаја за својот грешен живот и заплака. И сред христијанските маченици возвикна: „И јас сум христијанин!“ Судијата го подложи на маки, нареди и грозно го биеја, потоа му истурија врело олово во устата и бидејќи тоа не го повреди - му ја отсекоа главата со меч. Робовите го зедоа неговото тело и го однесоа во Рим. Ангел Божји ѝ се јави на Аглаида и ѝ рече: „Прими го оној што некогаш ти беше слуга, а сега ни е брат и сослужител; тој ти е чувар на душата и заштитник на животот“. Ужасната, Аглаида излезе во пресрет, го прими телото на Бонифатиј, му изгради црква и во неа ги положи моштите на маченикот. Таа потоа се покаја, им го раздаде сиот свој имот на бедните, а самата се повлече од светот и поживеа уште петнаесет години во горко покајание. Свети Бонифатиј пострада во 290 година.( Од Верскиот календар на МПЦ )

На празникот на св. маченик Бонифациј- во храмот се насобра многуброен народ, од најразлична возраст. Со бројаница во рака, доста млади луѓе пристигнаа на светата Литургија која отпочна околу 3 часот наутро. Оддалечени од  почетокот на бдението, но сепак не ја пропуштиа можноста да дојдат  и да се помолат ,  заедно со насобраниот верен народ .

Фото:

 Преминпортал

Никола Темелкоски

Посети:{moshits}