Сеноќно бдение во Марков манастир

 Во Марковиот манастир „Св. вмч. Димитриј Солунски“, (Маркова Сушица), ноќта 27-28 јануари 2012 година, на празникот на преподобен Гаврил Лесновски  и преподобен Павле Тивејски, со почеток во 22:00 ч. се одслужи сеноќно бдение со Божествена Литургија. Со Бдението чиноначалствуваше отец Дејан Трајков во сослужение на ѓакон Ѓоко Бурлијазоски. Верниот  народ се причести со Светите Христови Тајни. По бдението, игуменијата на Манастирот с.Илијана и о.Дејан ги подкрепија верните со благослов, чај, колачи и топли зборови.

По молитвите на преподобниот Гаврил Лесновски, Господе Исусе Христе помилувај нè грешните.
Радувај се Лесновска Горо.

+++

Укажувања од отец Дејан: Сведоци сме на фактот дека во современиот свет сè повеќе луѓе ја напуштаат верата, а атеизмот сè повеќе зема замав. Од тука важноста и одговорноста на христијаните да станат светло и сол на светот. Но и апел кон секој од нас поединечно да го живее евангелието секојдневно. Љубовта да ни е вистинска, искрена, чиста, неоскврнета, да ги љубиме блиските без лицемерие или користољубие. Само со таков подвиг на љубов кон себе (но онаа која мене ме води во спасение, види ап.Лука подолу) и љубов кон блискиот ќе дојдеме до Бога и ќе дадеме вистински плодови. Така на светот ќе му покажеме дека во Бога не веруваме од земски побуди или од традиција.

Подтик за ваков живот нека ни бидат и пораките од денешните четива за неопходните услови да се стане Христов ученик и заслужи живот вечен:

- да бидеме управувани од Духот, а не од похотите на човечката природа;  за така - да ги исполнуваме законот и вољата Христови.(Лука 14)

Неопходни услови да се стане ученик
„Така и ниеден од вас, кој нема да се откаже од сè што има, не може да биде Мој ученик.“

Неполезна сол
„Солта е добро нешто, но ако таа облутави, со што ќе се соли? Ниту на земјата, ниту на ѓубрето нема да му е потребна; па затоа ја фрлаат надвор. Кој има уши да слуша, нека чуе!”

А КАКО ТОА ДА ГО ПОСТИГНЕМЕ ВО СЕКОЈДНЕВНИОТ ЖИВОТ НÈ УЧИ АПОСТОЛ ПАВЛЕ:

(Галатјаните 5)

„Да се биде управуван од Духот, а не од похотите на човечката природа. Вие, браќа, повикани сте кон слобода; но слободата ваша да не ви служи како повод за угодување на телото, туку со љубов служете си еден на друг. Зашто, целиот Закон се извршува во еден збор, односно: сакај го ближниот како самиот себе.“

„Да не бараме лажна слава, еден друг да не се предизвикуваме, еден на друг да не си завидуваме. Браќа, и да падне човек во некаков грев, вие духовните поправајте го таков со духот на кротоста, пазејќи се и вие да не бидете искушани. Поднесувајте го товарот еден на друг и исполнувајте го така законот Христов.“

...

И за крај или како почеток на практична примена на Словото, интересно попатно расудување во автомобилот упатен кон Марковиот Манастир. Расудување кое може многу да ни помогне во односите со некои од блиските – „атеистот интуитивно со умот многу добро знае за Бога но грешката му е во тоа што бара разумно објаснување“.
Во оваа смисла, за атеистот вистинска и одлучувачка помош е личниот пример на блиските христијани, а не разумни убедувања или, не дај Боже, принуда.

За Преминпортал:

Ратислав Кардалев