Милосрдието e царица на добродетелите, велат светите отци на нашата чудесно убава Православна Црква. Преку чистосрдечното милосрдие се „купува“ Царството небесно. Благодарение на оваа богомила добродетел, манастирите се одржувале и опстојувале и во најтешките времења, кога биле под закани од иноверните власти, притеснети од голема немаштија и други разни неприлики. Неуморноста и пожртвуваноста на богоносните отци од манастирите во трудољубивото поднесување на разните послушанија за творење на богоугодни и радосни за човештвото нешта, ги поттикнувале отсекогаш благочестивите луѓе од сите времиња, да ги помагаат свештените манастири. Благодарение на милосрдието од страна на нашиот верен народ, и Бигорската свештена Обител опстојувала низ вековите, а опстојува и денес, за слава Божја.

Побудени од извесни невистинити и неблагопријатни гласини, што во последно време допреа и до нашите уши, а кои се однесуваат на финансиската помош за Бигорскиот манастир од македонската дијаспора во Австралија, САД и Канада, најдовме за полезно да дадеме едно подробно известување во врска со тоа.

Имено, на Архиепископскиот црковно-народен Собор одржан во соборниот храм „Св. Климент Охридски“ во Скопје, на 12 ноември 2009 година, кога стана збор за помош за возобновување на Бигорскиот Манастир, неговите членови испратија апел до сите епархии, цркви и манастири во МПЦ, и сите физички и правни лица, согласно своите материјални можности, финансиски и материјално да го помогнат возобновувањето на опожарениот конак (4та и 5та точка од резолуцијата на АЦНС). Тогаш митрополитот Преспанско-пелагониски и администратор Австралиско-новозеландски г. Петар, изјави дека собирањето на финансиските средства од Македонците иселеници во Австралија, ќе се одвива преку митрополитот на Австралиско-новозеландската епархија, иако Бигорскиот Манастир имаше сопствена девизна жиро сметка, благословена од МПЦ-ОА.

Следствено, до денес (30 декември 2011/12 јануари 2012 л. Г.), во нашата свештена Обител, како помош во парични средства од Македонците иселеници во Aвстралија, преку раката на митрополитот Петар, пристигнале вкупно 5 550 AUD ( пет илјади и петстотини и педесет австралиски долари), и тоа:- Со сметкопотврда б.б., од 16 ноември 2009 г., храмот „Св. Илија“ од Фуцкрој подари 1.200 AUD ( илајда и двеста австралиски долари) , храмот „Св. Никола“ од Престон – 1.000 AUD ( илјада австралиски долари) и храмот „Св. Димитриј Солунски“ од Сирвол – 500 AUD ( петстотини австралиски долари);- Со Каса прими бр. 0010/2010, од 15 јуни 2010 г., од храмот „Свето Воскресение Христово“ од Рокдаил се подарени 2.000 AUD ( две илјади австралиски долари);- Со Каса прими бр. 0011/2010, од 15 јуни 2010 г., од манастирот „Св. Прохор Пчински“ се приложени 850 AUD ( осумстотини и педесет австралиски долари).

Независно, пак, од управата на Австралиско-новозеландската епархија, донации за Бигорскиот Манастир од Македонците во Австралија пристигнале и преку -г. Ник Ристески, кој со посредство на својата радиоемисија успеал да собере финанскиска помош од 13.850 AUD ( тринаесет илјади и осумстотини и педесет австралиски долари) ; -храмот „Св. Димитриј Солунски“ од Волонгонг подари 4.000 AUD ( четири илјади австралиски долари),- а од градот Перт, Западна Австралија, преку прота Станко и претседателот на општината г. Јоте, се принесени 8.690 AUD ( осум илјади и шестотини и деведесет австралиски долари). Така, од Македонците во Австралија, кои самоиницијативно се организирале да му помогнат на Бигорскиот манастир, биле собрани вкупно 26.540 AUD ( дваесет и шест илјади и петстотини и четириесет австралиски долари).Преку Американско-канадската епархија на МПЦ – ОА, предводена од митрополит Методиј, за Бигорскиот манастир се подарени 6.000 CAD ( шест илјади канадски долари) и 5.250 USD( пет илјади и двеста и педесет американски долари) , од кои:-2.500 USD ( две илјади и петстотини американски долари) се од храмот „Св. Кирил и Методиј“ од Њу Џерси, -2.000 USD ( две илјади американски долари) од храмот „Св. Богородица“ од Коломбос, -500 USD ( петстотини американски долари) од храмот „Св. Богородица“ и-250 USD ( двеста педесет американски долари)од храмот „Св. Никола“ од Тотава.

Независно од управата на Американско-канадската епархија, храмот „Св. Петар и Павле“ од Краунпоинт му подари на Бигорскиот Манастир 4.000 USD (четири илјади американски долари).

Нека праведниот Бог милостиво си спомне за сите коишто добронамерно помогнале и сѐ уште помагаат за возобновувањето на Бигорското вековно светлиште.Поради исклучително лошата финансиска состојба на Бигорскиот манастир, се доведува во криза целокупното нормално функционирање на манастирот, заради тоа што тој ги исцрпи сите средства од својот буџет во изградбата на „Горни Палат“. Со оглед на економската криза во која се наоѓа државата, од март, минатата година, не се префрлени никакви средства од Министерството за култура на РМ, не се пристигнати ниту поголеми донации, а и телефонските повици на телефоните за донирање 070/075/078/143 444 се сé помалку и манастирот, веќе, се наоѓа во сериозни долгови. Затоа упатуваме повик до сите благочестиви христијани и љубители на културното наследство, во согласност со своите можности, да го помогнат возобновувањето на овој наш многузначаен духовно-просветен центар, стекнувајќи го така благословот на великиот Претеча – св. Јован Крстител

Извор: Бигорски манастир