10 септември 2010 год.- На празникот на преподобен Мојсеј Мурин и преподобен Сава Псковски и Крипецки
Свето Евангелие од светиот апостол Марко (зач. 19)
Во она време премина Исус отаде море, во страната Гадаринска. И кога излезе Он од коработ, веднаш Го сретна еден човек од гробиштата со нечист дух. Тој живееше во гробовите, и дури со вериги никој не можеше да го врзе; оти многупати беше во окови и во вериги врзан, ама ги кршеше веригите и ги раскинуваше оковите, и никој не можеше да го скроти; и секогаш, ноќе и дење, по гробиштата и по ридиштата викаше и се удираше со камења. Штом Го виде Исуса оддалеку, притрча и Му се поклони. Па, како извика со висок глас, рече: „Што имаш, Ти, со мене, Исусе, Сине на Севишниот Бог? Те заколнувам во Бога, не мачи ме!“ Зашто му беше рекол: „Дух нечисти, излези од човекот!“ И го праша: „Како те викаат?“ А тој одговори и рече: „Легион ми е името, оти сме многу.“ И Го молеа многу да не ги пади од тој крај. А таму, по ридот, пасеше голем број свињи. И сите бесови Го молеа и велеа: „Прати нè во свињине, да влеземе во нив.“ И Исус веднаш им позволи. Па, како излегоа, нечистите духови - влегоа во свињите; и се гргнаа свињите по стрмнината во морето, а беа околу две илјади; и се издавија во морето. А оние, што ги пасеа свињите, побегнаа и известија во градот и по околијата. И мнозина излегоа да видат што станало. И дојдоа при Исуса, и го видоа бесниот како седи облечен, и со здрав ум, во кого имаше легион, и се уплашија. А оние, кои беа виделе, раскажуваа што стана со бесниот и со свињите. И почнаа да Го молат да си отиде од нивните краишта. А кога влезе во коработ, оној, што беше порано бесен, Го помоли да биде со Него. Исус не му позволи, но му рече: „Оди дома при своите, па раскажи им што ти направи Господ и како те помилува.“ Си отиде, и почна да раскажува по Десетоградието што му направи Исус. И сите се чудеа.
На 10 септември 2010 година, во Шеснаесеттата недела по Педесетница, на празникот на Преподобен Мојсеј Мурин; Преподобен Сава Псковски и Крипецки, во храмот на Светото Благовештение, во кругот на Клиничкиот центар во Скопје, отец Душко Наумоски отслужи Божествена Литургија. На Литургијата верениот народ се причести со Светите Христови Тајни. На певницата псалтот Горан принесуваше молитви кон Бога.
Свети Ефрем Сирин
Ни во светот ни меѓу монасите никој не бива овенчан без борба. И никој без борба не може да стекне невенлив венец и живот вечен, зашто сегашниот живот сличен е на борилиште. Совршените борци радо и без приговор тргнуваат во борба, а плашливите и разгалените постојано ја одбегнуваат. Совршените борци и воздржливите подвижници пред очите секогаш го имаат рајот, и очекуваат во него да се насладуваат со неговите добра, во вечната светлина и бесмртниот живот. Сакаш ли да влезеш во оваа борба и да бидеш совршен? Постојано облекувај се во добродетелта, како во одежда. Или можеби веќе ја имаш на себе? Тогаш неизоставно и постојано на сите начини настојувај никогаш да не ја слечеш од себеси.
Лето Господово 2010
