Во тихуванието на свештената молитвена атмосфера во светиот храм на Чесниот Претеча во Бигорски, денеска со благодарност и благоговение беше отслужено уникатното богослужение – Царските Часови за празникот на Светото и светло Богојавление. Овие Часови, со својата длабока богословска содржина, нè воведуваат во таинството на Христовото Крштение и ни ја откриваат длабочината на Божјата сеопфатна љубов и снисходење.
Царските Часови, кои се служат само пред трите најголеми празници во Црковната година – Рождество, Богојавление и Воскресение, претставуваат литургиска слика на спасителното дело на Словото Божјо. Преку читањата на Псалмите и Пророштвата, на Апостолот и Евангелието, и преку химнографските сочиненија полни со вишна мудрост и просветление, пловиме низ историјата на спасението – од Стариот Завет, преку Воплотувањето, до спасителната Тајна на Крштението на Спасителот во реката Јордан од страна на Божествениот Претеча и Крстител Јован. На овој ден, кога Бог му се открива на светот како Троичен – Отецот Кој сведочи, Синот Кој се крштава и Духот Свет Кој слегува – целото создание со восторг ликува и учествува во благодатната обнова.
Со особена молитвена состедоточеност, нашиот возљубен Старец, Епископот Антаниски г. Партениј, го прочита Евангелието од Деветтиот час, преку кое беше возвестено сведоштвото за Христовото Богојавление. Како и секогаш, присуството на Старецот внесе дополнителна духовна длабочина и благодат во ова свето богослужение. Неговото читање, полно со љубов и молитвена смиреност, повика на значењето на Христовото Крштение како почеток на нашето лично преобразување и обновение.
Богослужбата, богата со древните писанија и песнопенија, нè поттикна сите на размислување за нашето сопствено крштение, за обновувањето на нашиот завет со Бога и за потребата од постојано очистување на душата преку покајание и молитва. Светлината на Богојавлението, која почнува да зрачи од оваа богослужба, нè потсети дека сме призвани да учествуваме во таа голема благодат што му се јави на светот, да ја сведочиме со своите лични животи и да Го пресретнуваме Христа во нашите срца, Кој се крштава од Јована за наше спасение и за обновување на целата твар.
Раката твоја, која се допре до пречистата глава на Владиката и со која, исто така, со прст ни Го покажа Него, подигни ја за нас кон Него, Крстителу, бидејќи имаш големо слободоречие, зашто ти, кој си поголем од сите Пророци, од Него си засведочен. Очите твои, пак, кои Го видоа Сесветиот Дух како во облик на гулаб слегува, подигни ги пак кон Него, Крстителу, и милостив кон нас направи Го. И дојди , застани со нас, запечатувајќи ја нашата химна и претстоејќи на ова торжество.
https://bigorski.org.mk/vesti/bogosluzhbi/carskite-chasovi-za-svetoto-bogojavlene/
