Со пристигнувањето на кичевската илинденска коњаница во манастирот „Св. Јован Претеча“ – Слепче кое беше најавено со биење на камбаните, воочи празникот Илинден, денеска при влезната капија на Манастирот, која со векови ги чува трагите од куршумите на сите оние кои не се ослободија од своето властољубие како желба да владеат со другите, се отслужи ПАНИХИДА за сите оние кои го положија животот застанувајќи во одбрана на сираците, вдовиците, немоќните, и сите кои ја сакаат слободата од Бога им дарувана.
На свеченоста беше осветен леб (колач) во чест на св. Марина (Огнена Марија), која се прославува денес.
Лебот беше прекршен од игуменот Сeрафим и водачот на коњаницата, за здравје и спасение на сите учесници во коњаницата и присутни.
Се отслужи и панихида за сите загинати бранители на Македонија, сите учесници во илинденскиот период, како и за народот кој бил под ропство. Како што беше и во најавата, молитвите за упатени и за непријателите.
Во молитвите на панихидата беше спомнато и целото население кое страдаше под јаремот на поробувачите а кое денес не е помеѓу живите на земјата, но живо остана за Бога.
Молитвите на панихидата упатени кон Живиот Христос се за прошка на гревовите на сите оние, кои зедоа дел во таа слободарска кауза, како и за прошка на гревовите на сите оние кои во туѓи војски извршуваа наредби на претпоставени, а беа во редот на поробувачите. Молитвите беа и за сите оние кои како непријатели на жителите на оваа земја се пројавија, ние, и за нив од Христа нашиот Спасител, милост бараме. Како Христијани непријатели немаме, бидејќи и нив ги љубиме, бидејќи Господ и за нив ја пролеа Својата Крв.
Отец Серафим го спомена Мелхиседек од Стариот завет кој го пречекал Аврам со леб и вино, што е симбол на телото и крвта на Христос. Во овој контекст беше и благословот над коњаницата, односно луѓето кои се залагаат за слободата, да се умножуваат и преумножуваат, бранејќи ја слободата и нејзините вредности кај сопствениот народ.
Фото: Маја Богоевска
https://citaj.be/panihida-vo-slepcenskito-manastir-za-onie-koi-go-polozija-zivotot-za-slobodata/
