Културно-историската манифестација „Денови на Јустинијан I", тековнава 2008 се одржува трета година по ред, во Скопје - родниот град на еден од најголемите императори во историјата на Византија. Со манифестацијата се одбележува годишнината од раѓањето на Јустинијан I (11 мај 483г.), кој потекнува од Таор, и кој на овие простори ја подига таинствената архиепископија „Јустинијана Прима". Замислена како своевиден спој помеѓу античкото и модерното време, манифестацијата има за цел да ги заживее и пренесе историските и културните традиции од Јустинијановото во современо Скопје. Самиот факт што Јустинијан I, со својата личност ја симболизира идејата на Византија за обединета Европа, претставува основа за промовирање на историските и културнитетрадиции на Скопје и Македонија, и нивното значење за општоевропската култура ицивилизација.
Владеењето на Јустинијан I (527~565г.) го означува најголемиот подем на Византиската Империја. Со триумфалните освојувања на Италија, јужна Шпанија и северна Африка, Јустинијан I, ја реализира сопствената идеја за реставрација и обединување на некогашната Римска Империја. Како ревносен христијанин, со цврста решителност дејствува во насока на воспоставување на доминантна позиција на христијанството, како и на создавање единство меѓу христијанските цркви. Со силна визија и интелект, ќе изврши кодификација на Римското право, со што, ги поставува основите на Европското право. Со голема страст, развива грандиозна градежна дејност, незапаметена во историјата на Византија. 600-те одбранбени утврдувања на Балканот, претставуваат само дел од неговите градителски проекти. Неговото родно место „Таурисиум", го воздигнува во „величенствен и многунаселен град", именувајќи го „Јустинијана Прима", и промовирајќи го во архиепископија „благословена во секој поглед". Монументалната црква „Света Софија" во Истанбул, претставува ненадминлив споменик на византиската уметност и архитектра, која го персонифицира Јустинијановиот дух за христијанска обнова. Јустинијан I е препознатлив и преку бракот со влијателната императорка Теодора, кој се вбројува меѓу најголемите и најконтроверзни романси во историјата. Дури и смртта на Јустинијан I, на 14 ноември 565 година, од современиците е опишана како „величенствена, јасно и недвосмислено демонстрирајќи дека последниот голем римски император го освоил светот".
„Денови на Јустинијан I"
ФЕСТИВАЛ НА ЦРКОВНО ИСТОЧНО ПЕЕЊЕ
Сабота, 17 мај 2008 год., Обновен храм „Пресвета Богородица"
12:00 ч. Свечено отворање на Фестивалот со поздравен говор
Хорските средби при Фестивалот, ќе се одвиваат во два дела, ревијален и концертен. Во ревијалниотдел настапуваат Епархиските хорски ансамбли:
> „Јован Хармосин" при храм Св. Георгиј - Криви Дол, Скопје;
> „Света Петка" при храм Св. Петка - Црниче, Скопје;
> „Јустинијана Прима" при МПБ „Св. Климент Охридски", Скопје;
> „Св.Теофил Струмички" при храм Св. Петнаест, Струмица;
> „Св. Нектариј Битолски" при храм Рождество на Пресв.Богородица,
Битола;
> „Св. Климент Охридски" при храм Пресв. Богородица - Перивлепта,
Охрид;
> градски Хор „Гевгелија", служи при храм Св.Кирил и Методиј,
Гевгелија;
> „Св.Благовештение" при храм Св. Благовештение, Прилеп;
> „Св. Никола" при храм Св. Никола, Штип;
> „Менада" - Тетово.
17:30 ч. Концерт
Со цел, да се поттикне начинот на произнесување на црковното пеење како посебна уметност, на Фестивалот на црковно источно пеење, за прв пат, се воведува оваа дисциплина. Начинот по кој се пејат светите химни е многу важен во православната химнографија, бидејќи неговата цел е да ја поддржува смислата на светите химни.
> целовечерен Концерт на најдобро претставените хорски ансамбли
(со програма селектирана од Комисијата);
> Источно-црковнопеење - Солисти
19:30 ч. Промоција на музичкиот компакт-диск со црковни химни „Статии на Велики Петок".
Организатор: www.preminportal.com.mk
Селектор на Програмата: Гоце Секулоски - Проф. на Катедрата по Црковно Пеење при МПБ „Св.Климент Охридски", Скопје
Денес ви ги претставуваме хоровите:
„Јован Хармосин“
ставропигијален храм Св. Георгиј
Хорот „Јован Хармосин“ е формиран во 2005 година од неколкумина вљубеници во Христовата Црква и нејзините логосни сокровишта и облици на свештените уметности – посебно музиката.
Има пеено во неколку бденија во повеќе македонски манастири. Хорот учествува во службите и литургиите во ставропигијалниот храм Св. Георгиј во Скопје.
Програма:
1. 1 и 3 песна од Пасхалниот канон, глас први
2. Свјат, свјат, свјат; од Канонот на Евхаристијата, глас петти
3. Изобразителен псалм 103, глас осми, светогорски мелос
Машки камерен хор
“Св. Климент Охридски”
Црковниот машки камерен “Св. Климент Охридски” од Охрид е формиран во 1992 година од страна на неколку ентузијасти, вљубеници во црковното хорско пеење.
За време од 16-годишното постоење настапуваше на голем број прослави, свечени академии, научни симпозиуми, црковни прослави и празнувања и други пригоди во градот а и надвор од него. Хорот одржа голем број на самостојни концерти во Охрид, низ Македонија а и надвор од неа. Позначајни настапи се:
• учесво на фестивалот “Тетовски хорски одзиви”
• гостување во Перник, Р. Бугарија,
• учество на меќунарондноиот хорски фестивал во Артос Орестикос во Р. Грција,
• учество на меѓународниот хорски фестивал “Празник на духовната музика” во Габрово, Р. Бугарија
• учество на меѓународниот фествивал “Св. Богородица - Достојно ест” во поморје, Р. Бугарија
Хорот редовноо пее на неделни, а по некогаш и на празнични литургии, наизменично низ активните храмови во Охрид.
Со хорот од 2007 година работи диригент Биљана Малезанов.
Хор Св. Нектариј Битолски
Хорот постои 1 година и се состои од музичари, теолози и музикални луѓе. Настапува во Црквата “Рождество на Пресвета Богородица” – Битола, во недели и на празници. Негува исклучиво источно црковно пеење.
Програма:
1. Тропар на св. Нектариј, глас I
2. Пасхални стихири, глас V
3. Ангел вопијасе, глас V
"МЕНАДА" од Тетово
БИОГРАФИЈА на хорот:
Градскиот женски младински хор "МЕНАДА" од Тетово е формиран во 1981 година. На репертоарот хорот има околу 300 композиции од ренесансата преку класика, современи композиции, македонски музички фолклор и евергрин композиции. Македонските композитори посветиле голем број на свои дела за хорот "Менада".
На Републичкиот натпревар во Кавадарци од 11 настапи има освоено 11 златни плакети.
Хорот е редовен учесник на Хорскиот фестивал "Техо", "Скопско лето" и "Охридско Лето". Хорот "Менада" учествувал на фестивали и конкурси во Холандија, Данска, Бугарија, Чешка, Германија, СР Југославија, Грција, Словенија, Полска, Турција, Шпанија, Шведска, Италија, Албанија, Австрија, Романија, Португалија. Хорот освоил на меѓународни натпревари: прва награда во Добрич, Бугарија (1996); прва и втора награда во Гисен, Германија (1997); две втори награди во Литомишол, Чешка (1995); една втора и една трета награда во Превеза, Грција (1996, 1998); втора награда во Цеље, Словенија (1987); две први награди како и Гранд При на Фестивалот во Бад Ишл, Австрија (2001); и Интернационална награда на Берлинскиот Хорски Фестивал 2001 година
Хорот има повеќе настапи со Македонската Филхармонија и има издадено повеќе аудио и ЦД записи, хорот е добитник на "19 Ноемвриска", награда на град Тетово, како и наградата "Кирил Пејчиновиќ".
Оснивач на хорот е д-р Ивица Зориќ и за својата работа добитник е на награди за диригент во Полска, Србија, Бугарија, Грција, на фестивалите во Македонија, како и највисоката државна награда "11 Октомври" во 2005 година.
БИОГРФИЈА на диригентот:
Маестро д-р ИВИЦА ЗОРИЌ, е роден во Белград во 1948 година. Основно образование завршил во Тетово, а средно музичко училиште во Битола. Дипломирал, Магистрирал и Докторирал на ФМУ во Скопје, како прв Доктор од областа на интерпретација во Република Македонија.
Во 1977 година го основа детскиот хор "Лале", а во 1981 година го основа и женскиот младински хор "Менада" во Тетово.
Од 1980 до јули 2007 година беше Директор на ОМУ "Тодор Скаловски - Тетоец" од Тетово, под чие раководство учениците од оваа училиште освоија 180 републички и 50 меѓународни награди. На репертоарот со хоровите со кои работи поставил повеќе од 450 композиции од различни стилови и епохи на 18 јазици. Во македонската и меѓународната културна јавност познат е пред се како реномиран хорски диригент. Со хоровите "Лале" и "Менада" има остварено повеќе од 1000 настапи во земјава и странство. Како диригент со хоровите настапувал на фестивали, коцертни турнеи и конкурси во 17 земји: Албанија, Бугарија, Србија, Грција, Словенија, Турција, Романија, Италија, Австрија, Германија, Чешка, Полска, Шпанија, Шведска, Холандија, Данска и Португалија.
Како учесник на меѓународните хорски натпревари во странство ги освоил следните награди: Прва награда во Добрич, Бугарија; две втори награди во Литомишл, Чешка; една прва и една втора награда во Гисен, Германија; една втора и една трета награда во Цеље, Словенија; една втора и една трета награда во Превеза, Грција; две први награди и "Гран при" во Бад Ишл, Австрија. На меѓународниот хорски фестивал "Драган Шуплевски" во Скопје во 2002 година ја освои третата награда, а на фестивалот во Хајновка, Полска во 1999 година доделена му е наградата за најуспешен диригент на фестивалот. На републичкиот натпревар во Кавадарци со хоровите "Лале" и "Менада" освоил 21 прво место и 2 втори места, како и повеќе пати награда за диригент и награди за праизведба. Повеќе македонски композитори посветиле композиции за маестро Ивица Зориќ и за хоровите со кој работи. Како музички истражувач, теоретичар и педагог од областа на хорската музика учествувал со свои трудови на домашни и меѓународни собири и трибини. Во организација на Хорскиот фестивал "ТЕХО" вклучен е од самиот почеток, денес е претседател на Управниот одбор на оваа, кај нас, единствена меѓународна хорска манифестација.
Како општественик во областа на културата, организирал повеќе од 1000 концерти на сериозна музика со реномирани домашни и странски уметници. Иницијатор и оснивач е на "Балканскиот хорски форум", во Тетово во 1998 година во кој членуваат преставници од Македонија, Албанија, Бугарија, Грција, Турција, Србија и Романија.
Во 1979 година ја добива "19 Ноемвриската" награда на Тетово, во 1982 година наградата "Кирил Пејчиновиќ", во 2005 највисоката државна награда на Р. Македонија "11 Октомври" и во 2007 година наградата на Здужението на музички педагози за "Повеќегодишна успешна работа во областа на музичката педагогија".
Посети: {moshits}
Св. великомаченик Мина; Св. маченик Стефан Дечански, крал српски; Св. маченици Виктор и Стефанида; Св. маченик Викентиј ѓакон; Преп. Теодор Студит; 
