Скопје, 28 март 2013 (МИА) - Национална кампања почнува денеска со цел собирање средства за реконструкција и адаптација на простор за педијатриски Ургентен центар на Клиниката за детски болести, кој ќе овозможи подобра и навремена здравствена заштита на децата, односно на пациенти до 18 години. Во рамки на кампањата која се одвива под мотото „Да помогнеме навреме“ потребно е да се соберат 55 илјади евра. Ургентниот центар ќе биде сместен на приземјето на Клиниката на површина од 130 м2.
Директорката на Клиниката, Аспазија Софијанова денеска на прес-конференција рече дека средствата ќе бидат наменети за реновирање и адаптирање на просторот, спроведување електрична инсталација, вентилација, водовод, канализација и системи за медицинска грижа. Тоа, посочи таа, во превод значи една мала мини болница каде што ќе можат веднаш да се згрижат децата.
- Средствата е предвидено да се соберат на донаторски коктел за ВИП личности што под покровителство на сопругата на претседателот, Маја Иванова ќе се одржи на 2 април во Македонскиот културен центар, како и преку лични донации од граѓаните на специјално отворениот телефонски број за оваа кампања 14321, истакна Софијанова.
Посочи дека моментално општата амбуланта на Клиниката каде се третираат сите пациенти, како и итните случаи е само една просторија со несоодветни услови за закажување на овие пациенти, а посебно за обезбедување соодветна и квалитетна итна помош.
- Со изградба на детскиот Ургентен центар ќе ги надминеме сегашните проблеми. Имаме недостиг од простор кој сметаме дека е важен особено просторот за тријажа, што значи распределување односно групирање на болните во групи според природата на болеста и според обликот и итноста на медицинската помош која треба да ја добие едно дете, набљудување и првичен третман, додаде Софијанова.
Главен покровител на Националната кампања е сопругата на претседателот на Република Македонија, Маја Иванова која рече дека за секој родител не постои ништо повредно и поскапоцено од животот на неговото дете.
- Јас ќе кажам за секој од нас не постои ништо повредно и поскапоцено од животот на секое дете. Верувам и очекувам дека граѓаните на Република Македонија ќе ја препознаат оваа голема и благородна мисија и акција и ќе дадат голема поддршка без разлика на нивната верска, етничка или национална припадност, зошто децата се нашата иднината, а и се тие кои секогаш не обединуваат. Секундите се многу значајни во спасување на еден детски живот во ваков Ургентен центар, истакна Иванова.
Партнери во кампањата се сопругата на амбасадорот на САД, Мери Џ.Волерс, холандската амбасадорка Мариет Шурман и Клеј Батемер од НВО „Линка Крос“.
Батемер рече дека детскиот Ургентниот центар ќе придонесе кон нивната визија секое дете во Македонија да има соодветен пристап до грижа.
- Во нашата улога како консултант во Клиниката „Линка Крос“ донесе американски доктор по ургентна медицина кој ни помогна да го концепираме Ургентниот центар. На крајот од месецов ќе пристигне уште еден специјалист по педијатриска ургентна медицина од САД за да помогне во доедукација на тимот од педијатри и сестри во Ургентниот центар, истакна Батемер.
Сопругата на амбасадорот на САД, Мери Џ.Волерс рече дека веруваат оти станува збор за многу вредна инвестиција затоа што инвестираат во животите на сите идни генерации во Македонија.
- Како медицинска сестра знам колку брзо еден детски живот може да се изгуби и колку медицинската помош мора да се даде навреме. Ургентниот центар ќе овозможи групирање и дијагностицирање, третман, како и испраќање на детето дома по соодветната нега или негов прием во болницата. Кампањата претставува можност за членовите на заедницата да ја покажат својата граѓанска одговорност преку донирање средства, истакна Виолерс.
Шурман потенцира дека без граѓански активизам ниедно општество не може да успее и обврска на секој е да се биде активен граѓанин. Слоганот на Холандската амбасада е „можеш ако сакаш“. Таа ги повика сите граѓани, компании и институции да донираат средства и да се вклучат во остварување на проектот за реконструкција и адаптација на простор за првиот педијатриски Ургентен центар во Македонија. рп/са/13:11
