Цела Македонија во Прилеп
Вкупно десет претстави ќе бидат во официјалната програма на годинашниов 43. по ред фестивал "Војдан Чернодрински" што ќе се одржи од 6 до 12 јуни во Прилеп. Ова е изборот на уметничкиот директор на фестивалот, Петар Темелковски, во кој се застапени скоро сите професионални театри од државава. Единствено Народниот театар од Куманово со претставата "Приказна за Роналд кловнот од Мек Доналдс" ќе биде дел од придружната програма. Во овој дел се и "Сердарот засекогаш љубов", копродукција на "Скрб и утеха" и Велешкиот театар, како и испитната претстава по актерска игра за втора година при ФДУ.
За наградите на единствениот државен професионален театарски фестивал, во трка ќе биде и новоотворениот Тетовски театар со "Импресарио од Измир" на Карло Голдони.
Драмски свој адут ќе има во "Супернова" по Лори Андресен, во режија на Златко Славенски, МНТ оди со "Дракула", домаќините со "Светилникот" на контроверзниот Димитар Талев, велешани со нивниот "Херострат", Албанскиот театар го има Војцек, "Женички" доаѓаат од Турскиот театар и "Бегалка" која во Прилеп ќе пристигне од Штип, а струмичани ќе ја играат "Комедијата од грешки" на Шекспир.
Завесата ќе се спушти со претстава по покана за свеченото затворање, и во чест на наградените со "Комшилук наопаку" на Драмскиот театар.
Покрај фестивалската програма ќе ги има и веќе востановените придружни манифестации - промоции на на театарски книги и други изданија поврзани со штиците што живот значат.
(Б.Г.) Вечер
