МИНИСТЕРКАТА КАНЧЕСКА-МИЛЕВСКА ЈА ПРЕЗЕНТИРАШЕ ПРОГРАМАТА ЗА ПРОСЛАВАТА НА 8 СЕПТЕМВРИ

Заедно под едно сонце, за 20 години независност

Кулминацијата на свечената прослава ќе се случи на централниот плоштад каде ќе биде изведен музичко-сценскиот спектакл "МАКЕДОНИУМ" во кој ќе учествуваат преку 300 уметници. Премиерно ќе биде изведена и композицијата "Македонија" избрана на конкурсот на Министерството за култура, која ќе ја интерпретираат 20-тина естрадни ѕвезди. Премиерната визуелизација на "МАКЕДОНИУМ", ќе се случи на досега најголемата сцена поставена на плоштадот која ќе биде долга 40 метри

Република Македонија годинава прославува 20 години од историскиот датум - 8 септември 1991 година. На овој датум македонскиот народ на Референдум и на најдемократски начин ја изгласа својата независност. По тој повод Владата на РМ вчера ја објави Програмата за достојно одбележување на јубилејот која ќе има космополитска дименизија и мисија - обединување на сите граѓани без разлика на нивната политичка припадност, идеологија, вера и националност. Целокупната прослава којашто ќе се одржи на 8 септември во Скопје ќе се одвива под слоганот "20 години државност - 20 години независна Македонија, заедно под едно сонце", а во нејзината реализација се вклучени над 2 000 луѓе.

"Прославата ќе ги илустрира нашето минато, сегашност и иднина, а Програмата ќе ги претстави уметничките и интелектуалните потенцијали и државотворните елементи на нашата земја, истакна вчера министерката за култура Елизабета Канческа-Милевска која придружена од тимот што ја осмисли прославата ги откри деталите.

Централната прослава ќе започне на 8-ми септември, во 18 часот пред Собранието со обраќање на претседателот Трајко Вељаноски и предавањето на Декларацијата за независност на гардата на Република Македонија, која ќе ја проследи до новиот Музеј на македонската борба за државност и самостојност. Во чест на предавањето на Декларацијата ќе се одржи свечено дефиле на сите единици на Армијата на РМ и на Министерството за внатрешни работи придружувани од Воениот оркестар. Со настапот на единиците ќе биде заокружена првата тематска целина од процесијата која понатаму ќе продолжи пред Портата Македонија - симболот на големата историска победа -независноста на Република Македонија.

Во новиот тематски дел насловен како "Иднина", преку 1000 деца заедно со Калиопи Букле и детскиот хор "Златно славејче" ќе ја изведат роденденската песна на композиторот Марјан Неќак. Децата први ќе поминат низ Портата Македонија и симболично ќе зачекорат низ слободната иднина на нашата земја.

На патот кон Музејот на македонската борба, свечената поворка со Декларацијата ќе помине и низ централниот плоштад, каде ќе има актери во костими од периодот на кои им припаѓаат историските личности претставени преку спомениците на плоштадот. Декларација ќе ја поздрават и 150 членови на културно-уметничките друштва од сите етнички заедници и околу 500 деца.
На Камениот мост на симболичен начин ќе се спојат минатото, сегашноста и иднината во чест на Декларацијата за независност на Република Македонија, која во 19.30 часот, претседателот на РМ, д-р Ѓорге Иванов, ќе ја положи во новиот Музеј на македонската борба, а Армијата ќе испука топовски плотуни од Скопското Кале. Отворањето на Музејскиот комплекс ќе биде илустрирано со познати сцени од нашето револуционерно минато, кои ќе бидат дел од театарскиот ораториум "Непокор". Во изведбата на перформансот ќе бидат вклучени актери од сите театри во државата. Армијата на РМ пред Музејот ќе изведе почесна стрелба за сите херои кои своите животи ги положиле за денешната независна македонска држава.

Кулминацијата на свечената прослава ќе се случи на централниот плоштад каде ќе биде изведен музичко-сценскиот спектакл "МАКЕДОНИУМ" во кој ќе учествуваат преку 300 уметници од Македонската филхармонија, Македонската опера и балет, ансамблот "Танец", детскиот хор "Златно славејче" и солистите Ана и Игор Дурловски. Премиерната визуелизација на "МАКЕДОНИУМ", ќе се случи на досега најголемата сцена поставена на плоштадот која ќе биде долга 40 метри и ќе биде опремена со најсовремена сценска техника и технологија.
По обраќањето на претседателот на Владата на Република Македонија, Никола Груевски ќе следи и грандиозното пуштање во употреба на фонтаната на плоштадот Македонија со споменикот Воин на коњ.

На централната прослава премиерно ќе биде изведена и свечената композиција "Македонија", избрана на конкурсот на Министерството за култура. Музиката на Кире Костов и текстот на Миодраг Врчаковски ќе ја интерпретираат дваесетина естрадни ѕвезди.
Прославата ќе се заокружи со голем музички хепенинг на кој ќе настапат околу 90 македонски имиња од забавната и народната музичка сцена.

Министерката Канческа-Милевска истакна дека на прославата не се поканети странски гости, туку само претставници од политичкиот, културниот и општествениот живот на Македонија.
Владата на Република Македонија ќе организира бесплатен автобуски превоз од 83 градови и општини во државата, за сите граѓани кои ќе сакаат да присуствуваат на централната прослава по повод Денот на независноста.

На Денот на независноста, 8 септември, ќе се реализираат и други активности. Во 9.30 часот во Алеата на великаните на Градски гробишта Бутел, ќе биде положено свежо цвеќе на гробот на д-р Никола Кљусев, првиот претседател на Владата на независна Македонија, како и на вечното почивалиште на трагично загинатиот претседател Борис Трајковски. Во 12.30 часот свечено ќе биде пуштена во употреба новата автопатна делница Табановце - Куманово на Коридорот 10, а во 13.30 часот во Македонската академија на науките и уметностите, ќе се промовира едицијата "Сто и триесет тома македонска книжевност", преведена на англиски јазик. Во 17 часот, претседателот на Собранието, Трајко Вељановски ќе оствари средба со претседателот, членовите и заменик-членовите на Комисијата за спроведување на референдумот за изјаснување на граѓаните на РМ за прашањето на суверена и самостојна Македонија. (Д.Т)

Промоцијата на Алекандар Велики и двокатните автобуси во ист ден
Настани и промоции по повод независноста на Република Македонија ќе има и на 6 и 7 септември. Така, на 6 септември во 12 часот пред платото на спортскиот центар "Борис Трајковски" ќе бидат промовирани новопроизведените двокатни автобуси за јавниот превоз во Скопје, додека во 13.30 часот свечено ќе се пушти во употреба обновениот и модернизиран аеродром "Александар Велики". На 7 септември, во Собранието на Република Македонија, во 12 часот ќе се одржи свечена седница по повод Денот на независноста, додека во 14 часот, во Владата на Република Македонија, претседателот на Владата на РМ, Никола Груевски ќе оствари средба со сите поранешни претседатели на Владите на РМ. Во 19 часот, во Македонската опера и балет, истиот ден ќе се одржи и свечена академија по повод независноста на Република Македонија, на која ќе се обрати претседателот на Република Македонија, Ѓорге Иванов.
Во текот на месец септември низ целата Република ќе бидат реализирани голем број на настани или манифестации од областа на спортот, културата, политиката, образованието, здравството, одбраната...