На Третата светска верска конференција, која се одржа во Скопје (од 10- 12 мај 2013 година, на која присуствуваа над 250 странски и домашни гости од сите континенти, верски претставници и професори-теолози),  годинава беше посветена на темата „Слободата и достоинството-основни вредности во меѓучовечките, меѓурелигиските и меѓукултурните односи“.
Конференцијата, во рамките на програмата, преку одржување три пленарни сесии, пред светската јавност  ги отвори темите: „Плуралистичките општества и религиската толеранција”, „Да се живее заедно со почит кон различностите“ и „Придонесот на медиумите за меѓурелигискиот и меѓукултурниот дијалог“.

На тема  „Плуралистичките општества и религиската толеранција“, свое размислување и порка произнесе  од Руската православна црква,  митрополитот Тамбовскиј и Рассказовскиј г. Феодосиј. Од  кратката пауза во  агендата на почитуваниот Владика г. Феодосиј, остваривме прекрасна  и со многу љубов исопнета средба. Му благодариме на Бог за се...

 Интервју со митрополитот Тамбовскиј и Рассказовскиј г. Феодосиј

  Преминпортал:   Ваше Високо Преосвештенство, драг владика Феодосиј, Христос Воскресна! Од тоа што прочитавме од вашата биографија, дознавме дека сте служеле во Чехо-Словачка, Германија,  долго време сте ја возглавувале православната мисија во Ерусалим, Тунис, па би сакале да ве замолиме да споделите со нас малку од тој опит.

  Митрополит  г. Феодосиј:   Навистина Воскресна! Фала Му на Бога, во мојот живот имав многу такви црковни назначувања, послушанија, кои што ми овозможија да го носам моето служење во Чехо-Словачка, дури таму и станав свештеник, во Карлових Вара; потоа студирав во Германија некое време, работав, се трудев во Одделот за Црковни врски, и потоа цели девет години бев началник на руската духовна мисија во Ерусалим. Секако тоа беше особено време, благодатно време. Бидејќи Ерусалим е местото каде што се роди, пострада и воскресна Христос, затоа многу поклоници и денеска таму патуваат, јас мислам дека и од Македонија, од Русија многу, а и од различни земји, а мене Господ ми благословил таму да се трудам, и за тоа секако сум Му благодарен. Додека се трудев во одделот, требаше да заминам, како што рековте, во Тунис (таму бев по послушанието на сегашниот патријарх Кирилл, кој тогаш го возглавуваше Одделот за надворешни Црковни врски) и тој ме испрати таму, да ја разгледам ситуацијата за можноста за отворање на руска православна парохија во Тунис. После моето патување, направив извештај, и ете, по некое време таму се отворија православни парохии во Бизерт и Тунис. Така да, интересна е мојата животна историја, и благодарен сум на Бога за неа. А и ова патување е исто така по благослов на Светејшиот патријарх Кирилл, дојдовме на оваа конференција, трета по ред тука. Со мене се и о. Дмитриј Сафонов, Андреј Јурјевич, соработници на Одделот за надворешни Црковни врски, кои се трудат под началството на владиката Иларион, претседателот на ОНЦВ. Така, ние ја составуваме и работата на оваа конференција со нашето паломничество (поклоничко патување), посетивме тука блиску, на планина храм од единаесетти век. Секако тоа е уникатно место, прекрасна светиња, фреските се прекрасно сочувани, и нас љубезно нѐ примија, ни раскажаа прекрасно за историјата на храмот. Вчера исто така посетивме и женски манастир, во близина на Скопје. Нѐ прими игуманијата. Таму се послушуваат неколку сестри, тие го обновуваат манастирот, како што разбравме. Нас многу нѐ израдува што таму имаше многу млади деца. Деца, кои таму дојдоа со автобуси, кои сѐ разгледаа, секако по детски, но прекрасно е што тие исто така ги посетуваат таквите познати свети места, се приопштуваат, допираат до тие богати православни духовни традиции што се наоѓаат тука, и се надевам дека ќе ги продолжуваат тие традиции.

    Преминпортал:  Исто така, сакавме да ве прашаме за Мисионерската дејност на Руската Православна Црква? Кај нас се доста познати и почитувани многу руски светители како Николај Јапонски, Јован Шангајски – сега Сан-Франциски кој некое време и се трудел тука.
  

  Митрополит  г. Феодосиј:  Кога ќе размислиме подобро, мисионерството е наша со вас, главна задача. И Господ испраќајќи ги Своите ученици на проповед рекол: Одете, и научете ги сите народи, крштевајќи ги во името на Отецот и Синот и Светиот Дух, то ест, и Христос ги испраќа своите следбеници на таа мисија, на проповед на Евангелието по цел свет, и од тогаш, главна грижа и задача на Црквата е мисијата, проповедта за Христос, и во руските краишта, проповедта за Христос ја донел ап. Андреј Првоповикан.  Но, ние знаеме, а вие веројатно особено знаете дека тука живееле и се подвизувале св. Кирил и Методиј. Тие исто така биле мисионери за словенските народи. Тие го превеле Светото Писмо, кое и денеска ние го употребуваме на богослужбите. И како што гледаме, мисијата е главната задача на Црквата. Така и Руската Православна Црква ги раширувала своите мисии и на Сибир, и како што кажавте за св. Николај Јапонски, имало мисионери на најоддалечените краеви на Русија, и дури зад нејзините граници, како Јапонија, Аљаска, така да мисионерството е важна мисија на Црквата. Но, денеска зборуваме за внатрешна мисија. Денеска не мора да одиме на Далечниот Исток, не мора да патуваме на Аљаска, денеска може да се рече дека меѓу нас живеат луѓе кои многу малку слушале за Христос, а некои дури и не сакаат да слушнат. И ние сме должни меѓу нашите сонародници, точно како во Македонија и Русија, а и секаде најверојатно каде што присуствува Руската православна Црква, да ја продолжиме истата таа мисија на која што не испратил Христос. И кон себе го насочуваме тој призив на Спасителот. И за нас тој е исто толку актуелен како и за учениците. Ние треба да го чуеме тој Христов призив денеска и за себе: Одете и научете ги сите народи! Крштевајте ги во името на Отецот и Синот и Светиот Дух. Ете од тоа и се состои нашето служење денеска.
    

   Преминпортал: Еден владика, пред неколку години рече, дека во времето на св. Кирил и Методиј, христијанството се пренело од Балканот, од Македонија во Русија, а сега ние многу учиме и примаме од Русија. Можеби забележавте дека во Македонија многу ги почитуваат руските светители. Веќе е изграден еден манастир посветен на Царските Страстотерпци, можеби ќе отидете таму, а се гради скит на преп. Серафим Саровски... Кај нас луѓето многу би сакале да слушнат слово од Рускиот Пастир, што е најважно за секој Христијанин?

   Митрополит  г. Феодосиј:   Вие прекрасно рековте, некогаш св. Кирил и Методиј заминали во тие области, Киевска Русија (да речеме нивната проповед). Светата Русија ја крстил кнез Владимир, и секако преводите на браќата тогаш станале многу потребни, биле неопходни за таа мисија да би се проширила низ Киевска Русија и подалеку. А денеска, навистина ние сме взаемно зависни. И прекрасно е кога имаме можност да се разменуваме со некој наш опит кој веќе се изградил во мисионерското служење, и прекрасно кажавте за св. Серафим Саровски, тука се гради скит, тоа е сведоштво, доказ за тоа дека словенските народи се многу блиски. По вера, секако, но и по култура, традиции, и таа Кирило – Методиевска мисија и денеска продолжува. Затоа тие денеска нѐ обединуваат, и му благодариме на Бога за тоа што ја имаме среќата да општиме, и се надевам, да се обогатуваме; ние, со тој опит кој што го имате вие овде, ние зборувавме тука за св. Климент Охридски, за кого вчера добивме и книги како подарок, со неговите поуки, слова и житие; но, и Руската Православна Црква има веќе пребогат, веќе повеќе од илјада летен опит на своето служење, и мислам дека тој опит исто така ќе биде полезен тука во Македонија. Да се подвизуваме во своето спасение и во љубовта едни кон други, по зборовите на св. Серафим Саровски: спаси се себеси, и илјадници околу тебе ќе се спасат. Да станеме Христови ученици, и тој ќе не направи ловци на луѓе. СпасиБо вам! Христос Воскресе!

  Преминпортал (к.т./ Златко Дивјаковски)

  ВИДЕО СНИМКА

Кратка биографија на митрополитот Тамбовскиј и Рассказовскиј г. Феодосиј

 Феодосий, митрополит Тамбовский и Рассказовский (Васнев Сергей Иванович)
 
Се родил на 26 Јануари 1961 год, во р.п. Пичаево Тамбовска област, во дом на свештеник. После завршувањето на средно образование и службата во армија, во 1981 г. се запишал во Московската духовна семинарија, која што во 1984 год ја завршил со одличен успех. Истата година станал студент на Московската Духовна Академија.
Во Јануари, 1985 г. од Свештеноначалството на РПЦ бил испратен во Чехо-Словачка на православниот богословски универзитет во Прешов, каде што добил повисоко богословско образование, завршувајќи го факултетот во 1988г со научен степен „магистер по богословие“ за тема на катедрата на црковна историја: „Крштението на Русија“.
Летото 1985 г во состав на група, која ги претставувала духовните школи на Руската Православна Црква, учествувал во работата на Меѓународниот младински лагер „Агапе 5“, кој се одвивал во Чехо-Словачка и бил организиран во рамките на Светската православна младинска организација „Синдесмос“.
По благослов на Светејшиот Патријарх Московски и на цела Русија, Пимен, на 22 Август, 1987 г во Троицкиот Собор на Московскиот Свето-Данииловски манастир, бил пострижен во монаштво од митрополитот Мински и Белоруски Филарет, Претседател на Одделот за надворешни црковни врски на Московскиот Патријархат (сега митрополит Минскиј и Слуцкиј, и Патријаршиски Егзарх на цела Белоросија),   со нарекуванње на името Феодосиј – во спомен на преподобниот Феодосиј, игумен Киево-Печерски.
На 28 Август 1987г, на празникот Успение на Пресвета Богородица, во храмот на светите првоврховни апостоли Петар и Павел во Лефортов, Москва, од епископот Каширски Феофан, викар на Московската Епархија, и заменик Претседател на Одделот за надворешни црковни врски на Московскиот Патријархат (сега архиепископ Берлински и Германски) е ракоположен во јероѓакон.
6 Септември 1987 г, од Блаженејшиот митрополит Пражски и на цела Чехо-Словачка Дорофеј, е удостоен со награда на Чехо-Словачката Православна Црква – орден на светите рамноапостолни Кирил и Методиј III степен.
1 Јануари, 1988 г, по указ на Светејшиот Патријарх Московски и на цела Русија Пимен, назначен е да го исполнува ѓаконското служење на Подворјето на Руската Православна Црква во Карлови Вари, во Чехо-Словачка.
Пролетта, 1988 г на православниот богословски факултет во Прешов (Чехо-Словачка) учествувал во работата на Меѓународната конференција, спроведена од „Синдесмос“ заедно со Светската федерација на Христијански студенти (ВФХС- Всемирная федерация християнских студентов).
Во март, 1988 г од Светејшиот Патријарх Московски и на цела Русија Пимен е награден со Патријаршиска грамота.
Во Јуни, 1988 г бил учесник во торжеството, кое го организирала Руската Православна црква, по повод историскиот јубилеј – 1000 годишнина од Крштевањето на Русија.