дипл. теолог Александар Божиновски

Црквата на Сите Светии на Аљаска во градот Кодиак, Аљаска - Божествена Литургија (07. 06. 2007 г.)

Црквата на Сите Светии на Аљаска во градот Кодиак- Аљаска

Во четвртокот на 7 Јуни кога Православната Црква го прославува празникот Трето наоѓање на главата на Св. Јован Крстител во црквата на Сите Светии на Аљаска во градот Кодиак, Аљаска, беше отслужена Божествена Литургија. Со Литургијата чиноначалствуваше новопроизведениот свештеник о. Иван Берескин, родум од Аљаска.

На голема радост на сите наши верници каде и да се, од певницата се слушаше милозвучната мелодија на македонското црковно пеење, поточно мелодијата од манастирот на Пресвета Богородица-Елеуса од Струмичката епархија. Му благодариме на Бога што и македонскиот јазик и црковнославјанскиот беа користени скоро преку целата Богослужба. Бог ни е сведок, кога се пееше песната на Достојно се почуствува емоционалната реакција на свештеникот.

Солзите на радост и чувството за вечност кај свештеникот беа присутни од тој момент се до крајот на Светата Литургија.

Стилот на градба на црквата која е посветена на Сите светии на Аљаска е реплика на првата црква што била изградена во далечната 1794 од страна на Св. Герман Аљаскин заедно со уште неколкумина мисионери кои го прповедале Евангелието за Христа и на ова парче земја. Долгиот пат од речиси една година што го изодел Св. Герман од Валаамскиот манастир од Русија до островот Кодиак на Аљаска несомнено зборува за неговата голема жртва, љубов и ревност да проповеда за Христа.

Тука се и многубројните чуда кои се поврзани со овој светител. Најголемото од сите е кога Св. Герман го запрел морскиот бран-Цунами поставувајќи ја иконата на Пресвета Богородица на брегот и просејќи ја нејзината заштита.

подготви: Александар Божиноски

Дипломска вечер на Богословскиот факултет Св. Герман Аљаскин во Кодиак, Аљаска

Со благослов на Неговото Преосвештенство епископот Николај Сораич, по потекло од Требиње, Босна, кој е епископ на Ситка, Анхореџ и Аљаска беше организирана 34-та Дипломска вечер по повод завршувањето на учебната 2006/07 год. на Богословскиот факултет Св. Герман Аљаскин во Кодиак, Аљаска.

Еден од четворицата завршени студенти е и чтецот Александар Божиноски кој е роден во Скопје, Македонија. Со Божја помош и по молитвите на Св. Герман Аљаскин, чтец Александар го заврши студирањето со одличен успех Magna Cum Laude.

Богословскиот факултет Св. Герман е основан во 1973 год.како пастирско училиште кое ќе соодветствува на потребите за возобнување на свештенството во овој дел од светот. Но само после неколку години од своето постоење ќе прерасне во факултет со сите свои атрибути кои претходно ги немал. На ова место имало и има видни професори кои и ден денес предаваат на институти како Св. Сергеј во Париз и неколку универзитети ширум Америка.

Самата духовност во факултет потсетува на духовните училишта кои постоеле во период кога схоластичката инфлуенција не ги инфицирала Православните училишта како што е случајот денес насекаде низ Православните земји. Духовноста на студентите најдобро може да се согледа од нивниот Литургиски живот. Најголема заслуга за тоа има деканот о. Чед кој преку примерот на светите Кирил и Методиј, Св. Инокентиј Аљаскин, Св. Герман Аљаскин, Св. Николај Јапонски и други се трудеше на најдобар начин да им го преточи мисионерскиот дух- да се сведочи за Господа и проповеда во Името на Отецот и Синот и Светиот Дух. Амин!