ФИЛМСКИ ФЕСТИВАЛ БОГОРОДИЧЕН ПОКРОВ ЗА ДУХОВНИ ВРЕДНОСТИ

Интернационалниот филмски фестивал „Богородичен покров“ има за цел да ги шири духовните, хумани и културни вредности и е единствен филмски фестивал  од ваков жанр во нашата држава, но, и редок во регионот, кој  годинава е online и се одржува од 11 до 26  декември оваа година, со реприза на програмата  од 1 до 16 јануари, 2022 година.
Фестивалот се отвара утре со видеото ДОБРЕДОЈДОВТЕ  во 20.00 часот и со рускиот филм Земниот живот на Пресвета Богородица во 21.00 часот.

Во програмата на фестивалот се прикажуваат документарни и играни филмови  посветени на културното,  духовно наследство и хуманоста, како и историски и биографски филмови.  Ќе  се прикажат  20 филмови и ТВ програми  од Македонија, Русија, Србија, Чешка и Словачка, Унгарија, Романија и Франција. Сите се преведени на македонски јазик ,   поголем број  на англиски, а дел од програмата е и на српски јазик.
Филмските проекции се бесплатни.
Годинава, фестивалот добива поширока меѓународна  димензија  со поддршка на Вишеград фондот на Вишеград групата држави, како и од Амбасадите на Русија, Чешка Република, Словачка, Унгарија, Романија.

Годинава, ќе бидат претставени авторитативни странски партнери и продукции во специјални интервјуа,  продуцирани за овој фестивал.  Ќе се презентира култот на свети Наум во Унгарија,  кој е непознат на пошироката јавност, со проф. д-р Марта Наѓ  од  Будимпешта, единствен светски експерт кој ја има истражувано оваа тема. Истиот ќе биде илустриран со раритетни икони на св.Наум од оваа држава. За филмскиот фестивал и фестивал на сакралната уметност Ars Sacra од Унгарија и за неговите извонредни достигнувања ќе биде емитувано интервју со претседателката г-ѓа Марта Драгонич. На овој духовен фестивал  кој се одржува во месец  септември во 2019 година  имало над 100.000  посетители,  на 700 настани во 418 места во Унгарија.
Фестивалот  Бдење душе од Србија,  ќе се претстави со филмовите Ровачки Острог и Сведоштвата за манстирот Тумане. Од руското духовно кино ќе се емитуваат филмовите Земниот живот на Пресвета Богородица, играниот филм Варава, документарниот Чудата на блажена Ксенија Петроградска, Една вера – еден јазик и други.   На фестивалот ќе се претстави и чешката продукција  Vistafilm, на чело со продукцискиот тандем Ива Хлавсова  и  Лубомир Хлавса, кои  имаат реализирано стотици духовни филмови и детски програми.  Нивниот  камерамен  Pavel Kopp беше прогласен за најдобар камерман во Лос Ангелес за оваа,  2021 година!  Со нив имаме специјално интервју по повод нивниот филм за великиот педагог, филозоф и писател Јан Амос Коменски,  кој  ја има и интернационалната премиера токму на нашиот фестивал. Исто така, од Чешка ќе биде прикажан и играниот филм посветен на мисијата на светите браќа Кирил и Методиј.

https://youtu.be/GPHzo6Q5Zgw

На фестивалот ќе се објави меѓународен повик под наслов „Како се научив што е љубов“! Секој е повикан, да испрати своја вистинска приказна од животот  на 2 до максимум 3 страници,  која се однесува на настани поврзани со духовната љубов која сме ја осознале, која  ќе биде поучна за идните генерации за препознавање на вистинските духовни  вредности!  Најдобрите приказни ќе бидат  објавени во заедничка книга на повеќе јазици,  која ќе има промоција во Охрид,  со сите избрани автори на приказните, кои ќе ја добијат на подарок  оваа книга. Приказните може да се испраќаат на   меиловитe Оваа е-адреса е заштитена од спамботови. Треба да ви е овозможено JavaScript за да ја видите.  на македонски јазик и на Оваа е-адреса е заштитена од спамботови. Треба да ви е овозможено JavaScript за да ја видите. на српски, англиски и руски јазик.
Деталите за програмата на фестивалот може да се следат на страниците https://www.facebook.com/festivalbogorodicenpokrov на македонски и на www.facebook.com/ holyvirginmaryomphorion на англиски јазик.

Од годинава, Европскиот Универзитет од Скопје, во чест на основачот Бојо Андрески, ќе доделува традиционално бесплатна четиригодишна стипендија за највредниот волонтер на фестивалот.
Инаку, фестивалот Богородичен Покров е основан во 2016- та година,  и досега е поддржан од 12 Амбасади во нашата држава. Се одржува со благослов на неговиот Почесен Претседател проф. д-р Јован Таковски, протојереј – ставрофор, одликуван со златен медал “Св. Климент Охридски” на државно ниво,  за неговиот живот и дело.
Програмскиот совет на фестивалот го сочинуваат: проф. др. Антонио Митриќески, режисер, професор  на ФДУ, проф. др Ѓоко Ѓоргевски, декан на  Богословски факултет “Свети Климент Охридски“ во Скопје, проф. др Игор Шокаревски, декан на Факултетот за дизајн и мултимедија на Американскиот Универзитет во Европа – ФОН,  Владимир Ангелов, виш филмолог и директор на Кинотека на Македонија.
На наша огромна жал, годинава се упокои нашиот член  на Програмскиот совет, Драги Таневски, директор на фотогафија, интернационален светски ас, кој во својата над 50 годишна  дејност во Вардар филм и МТВ беше наградуван  ширум светот, во Полска, Јапонија,  Шведска, Њујорк...Основачи на фестивалот се Зорица Соломан Костовска, ТВ и филмски продуцент и теолог и покојниот Коле  Јовановски, монтажер и режисер во МТВ на над 3000 филмови и ТВ програми. Најбројните негови филмски и ТВ
дела  се посветени   на македонската историја и на МПЦ-ОА Организатор на фестивалот е Топ Ворлд-ТВ продукција од Скопје.
Контакт 075 / 33 44 87.